Мәктәп йәшәһә, ауыл да йәшәй

Мәктәп йәшәһә, ауыл да йәшәй

Һәр беребеҙҙең бала сағы, үҫмер йылдары мәктәп менән бәйле. Оло тормошҡа аяҡ баҫыр алдынан һәммәбеҙ ҙә ошо белем усағында ҡанат нығытабыҙ.

Ғүмеребеҙҙең иң сағыу, шаян, ҙур маҡ­саттарға ынытылып йәшәгән мәле бит ул мәктәп йылдары. Был йылдарҙы беҙ һәр саҡ һағынып иҫкә алабыҙ. Үтәгән ауылы мәк­тәбен төрлө йылдарҙа тамамлаған, хәҙерге ваҡытта илебеҙҙең төрлө төбәктәрендә тор­мош көтөүсе класташтар һәм ошо мәктәптә хеҙмәт итеүселәр белем усағының 60 йәшлек юбилейына йыйылды.

- “Хужаһыҙ йорттоң йәме булмай”, - ти халыҡ мәҡәле. Тәүге һүҙҙе хужа башлай, был башҡорттоң изге йолаһы, - тип, алып бары­усылар тәүге һүҙҙе мәктәп директоры Зо­рина Иҙрисоваға бирҙе. Зорина Наил ҡыҙы байрамда ҡатнашыусыларҙы тәбрикләп, иң изге һүҙҙәрен еткерҙе. Артабан һүҙ сараның мәртәбәле ҡунаҡтарына бирелде.

- Үтәгән мәктәбе алтмыш йыл дәүерендә бик күп лайыҡлы уҡыусылар тәрбиәләне. Мәктәп үҙенең уҡыусылары менән хаҡлы рәүештә ғорурлана ала, - тине район мәға­риф бүлеге начальнигы урынбаҫары Гүзәл Сыңғыҙова һәм бер төркөм уҡытыусыларҙы бүләкләне.

Яңы Ҡыйышҡы ауыл советы хакимиә­те башлығы Фәнзиә Өмәтҡолова, Ҡыр­мыҫҡалы районы башҡорттары ҡоролтайы башҡарма комитеты рәйесе Илмира Ғә­лиәхмәтова, район мәғариф бүлегенең про­фсоюз ойошмаһы рәйесе Рөстәм Әминев, Ҡырмыҫҡалы сәнғәт мәктәбе директоры Хәниф Батталов һәм башҡалар ҙа үҙҙәренең изге һүҙҙәренә ҡушып, мәктәпкә бүләк­тәрен тапшырҙы.

- Беҙ 1960 йылда ошондағы ике ҡатлы ағас мәктәпте тамамланыҡ. Шул йылды яңы мәктәп өсөн нигеҙ һалына башлағай­ны. Ул нигеҙҙе һалыу эшенә беҙҙең дә ҡул тейҙе. Ошо ағас мәктәпте академиктары­быҙ Ғайса Хөсәйенов, Роберт Байымов та­мамлаған. Был инде ауылыбыҙ мәктәбенең ни тиклем көслө булыуы тураһында күп­те һөйләй. Мәктәбебеҙ әле лә үҙенең ошо көсө менән эшмәкәрлеген дауам итә, - тине үҙ сығышында ошо ауылда тыуып үҫкән Башҡортостандың халыҡ артисы Әхәт Хөсәйенов.

Төрлө йылдарҙа мәктәпте етәкләгән ди­ректорҙарға, ошо мәктәптә төрлө йылдарҙа эшләп киткән һәм хаҡлы ялдағы уҡытыусы­ларға, сығарылыш класы уҡыусыларына ла һүҙ бирелде байрамда. Уларҙың һәр береһе Үтәгән мәктәбендә хеҙмәт иткән йылдары­ның йылы хәтирәләре менән бүлеште. Төрлө йылдарҙа мәктәптә төрлө хеҙмәт башҡарыу­сылар ҙа ситтә ҡалмайынса гөлләмәләргә эйә булды. Мәрхүм булған һабаҡташтар, уҡытыусылар, яҡташтар хөрмәтенә бер ми­нутлыҡ тынлыҡ урынлаштырылды.

Үтәгән мәктәбенең юбилей сараһында һәр бер сығыш яһаусы тиерлек: “Мәктәп йәшәһә, ауыл да йәшәй!” - тигән һүҙҙәрҙе ҡабатланы. Эйе, мәктәпһеҙ ауыл ул айһыҙ мәсет кеүек. Ауылда мәктәп – белем биреү учреждениеһы ғына түгел, мәҙәни һәм рухи үҙәк тә, ауыл тормошо үҫешенең көслө фак­торы ла. Киләсәктә лә мәктәптәребеҙ ҙә, ауылдарыбыҙ ҙа гөрләп йәшәһен!

Розалия НАЗАРОВА.

Автор фотолары.

Хәҙерге көндә Үтәгән мәктәбенең татыу коллекти­вында алты уҡытыусы, ике йыйыштырыусы, ике ҡара­уылсы, ашнаҡсы хеҙмәт итә. Уҡытыусыларҙың дүртәүһе юғары категорияға эйә. Бе­лем усағында 27 уҡыусы бе­лем ала. Улар Бөтә Рәсәй, республика конкурстарын­да призлы урындар яулауға ирешә.

 Үтәгән мәктәбе тарихының бер битен хөрмәтле ди­ректорҙар алып тора. Иҫке бинала 1954-1959 йылдарҙа Мөхәмәтҡолов Мәхмүт Баҡый улы директор булған. 1959-1965 йылдарҙа - Бикҡужина Сания Мөхәмәтрә­хим ҡыҙы. 1965-1998 йылдарҙа - Искәндәров Рим Сәй­етбаттал улы. 1998-2003 йылдарҙа - Йосопов Хәлит Дәүләтбай улы. 2003-2012 йылдарҙа - Вәлиева Сәйҙә Сәйетзада ҡыҙы. 2013-2020 йылдарҙа - Язғарова Гүзәл Фәрит ҡыҙы. 2020 йылдан башлап әлеге көнгә тиклем Үтәгән мәктәбе директоры вазифаһын Иҙрисова Зорина Наил ҡыҙы башҡара.

 Лилиә Түрйән ҡыҙы ВӘХИТОВА:

- Үтәгән ауылында тыуып үҫтем, ошо ауыл мәктәбендә белем алдым. Са­лауат педагогия училищеһын тамам­лағас, 1989 йылда тыуған мәктәбемдә хеҙмәт юлын башланым һәм бында 23 йыл уҡыттым. Ситтән тороп инсти­тут тамамларға ла өлгөрөҙөм. Бөгөн­гө байрамда үҙемдең уҡыусыларымды күреп, хатта, ҡабаттан йәш саҡта­рыма ҡайтҡандай булдым. Шөкөр, уҡыусыларымдың һәр береһе үҙ урын­дарын табып, бөгөнгө көндә яратҡан эштәрендә эшләп йөрөй. Миңә тормош иптәшем эшләгән Ульяновск өлкәһенә күсеп китергә тура килде. Унда ла башланғыс кластар

уҡытыусыһы булып эшләйем. Ауылымды гелән һағынып ҡайтам. Туғандарыбыҙҙың ҡәберҙәренә зыярат ҡылабыҙ. Ҡасандыр үҙемде уҡытҡан уҡытыу­сылар менән бер коллективта эшләүем менән бәхетлемен. Байрам ныҡ оҡшаны.