Алыҫ араларҙы яҡын итеп, таҡтағоштар ҡайтты ғәзиз еренә...

Алыҫ араларҙы яҡын итеп, таҡтағоштар ҡайтты ғәзиз еренә...

Йәмле тәбиғәт ҡосағында урын­лашҡан Яңы Бишауыл (Таҡтағош) ауылы төрлө ерҙәрҙә йәшәгән яҡташтарын “Һаумыһығыҙ, ауыл­даштар!” байрамына йыйҙы. Көн һалҡынса, ямғырлыраҡ булыуға ҡарамаҫтан халыҡ байтаҡ йый­ылғайны. Кеше ҡайҙа ғына йәшәһә лә уның өсөн ғәзиз ауылҡайы иң яҡыны булып ҡала. Шуға көйһөҙлә­неп торған һауа торошо ла байрам кәйефен боҙоп, тәьҫир итә алманы. Ошо ерҙә ҡалып, ауылды һүндер­мәй йәшәгән халыҡ башҡа тараф­тарҙа йәшәгән, тыуған ерен һағынып ҡайтҡан яҡташтарын ҡолас йәйеп ҡаршы алды. Улар ата-бабалары төйәгенә, тәпәй баҫҡан ерҙәренә ҙурлап та, тулҡынланып та, ашҡы­нып та алыҫ араларҙы яҡын итеп ҡайттылар. Был сарала махсус хәр­би операцияла ҡатнашып, әле ялда булған Әлхәт Ғөбәйҙуллиндың булы­уы икеләтә шатлыҡ ине.

Осрашыу-күрешеү шатлығынан күңелдәре тулышҡан, бер-бе­реһен һағынған ауылдаштарҙы, туғандарҙы, бергә уҡыған класташтарҙы күреү тулҡынландырғыс булды.

Был көндө ҡатын-ҡыҙҙарҙың ҡул эштәре, һуғыш яландарынан табып алып ҡайтҡан экспонаттар, махсус хәрби операцияла ҡатнашҡан ир-егеттәрҙең кәрәк-яраҡтары, Иҫке Бәпес ауыл биләмәһенән сыҡҡан билдәле шәхестәрҙең китаптарынан торған күргәҙмәләр менән танышы­рға була ине. Билдәле яҡташтары тураһында стендтар ҙа әҙерлән­гәйне. Әйткәндәй, бында “Урын­дағы башланғыстарҙы хуплау” программаһына ярашлы төҙөлгән балалар майҙансы ла йәм биреп ултыра. Ул балаларҙың ғына түгел, ата-әсәләрҙең дә яратҡан урынына әйләнгән.

Яңы Бишауыл - күп быуат­тар элек башҡорт халҡының Мең ырыуы ерҙәрен һатып алып, Та­бын ырыуы вәкилдәре төйәклә­гән, тамырланған изге ер ул. Ауылға яҡынса 1900-сы йылдарҙа нигеҙ һалына. Күрше Үтәймулла­нан (Ауырғазы районы) күсенеп килгән ғаиләләр таҡтанан ҡыуыш ҡороп, донъя көтөп йәшәп киткән. Тәүҙә ауыл дүрт өйҙән генә торған. Был ваҡыттан һуң күпме һыуҙар аҡҡан, ил күргәнде улар ҙа кисе­реп, сәйәси үҙгәрештәргә шаһит булып, замана елдәренә биреш­мәйенсә, йәшәйешен әлеге көнгә тиклем дауам итә.

Яңыбишаулдарҙың осрашыу шатлыҡтарын уртаҡлашырға мәртәбәле ҡунаҡтар - муниципаль район хакимиәте башлығының эшҡыуарлыҡ буйынса урынбаҫа­ры Рәсил Исламов, журналистика ветераны, дәүләт һәм йәмәғәт эш­мәкәре, Рәсәй Федерацияһы һәм Башҡортостан Республикаһы жур­налистар союзы ағзаһы, Башҡор­тостандың атҡаҙанған мәҙәниәт хеҙмәткәре, райондың Маҡтаулы гражданы, “Табын” ырыуҙары йәмәғәт ойошмаһы советы ида­раһы рәйесе Фәнил Ҡоҙаҡаев, Рәсәй Федерацияһы һәм Башҡор­тостан Республикаһы журналистар союзы ағзаһы, Ҡырмыҫҡалы рай­онының табын ырыуы Ҡор башы Фәрғәт Ҡотлобаев, Иҫке Бәпес ауыл хакимиәте башлығы Азамат Ғәйфуллин килде. Уларҙың ба­рыһы ла байрамдарҙа ҡатнашы­усыларҙы сәләмләп, сараға әҙер­ләнеүселәргә, ҡатнашыусыларға рәхмәттәрен белдерҙе.

Сараның иң тулҡынландырғыс мәле бүләктәр тапшырыу булғандыр. Муниципаль район советының Маҡтау ҡағыҙы менән йәштәрҙе патриотик рухта тәр­биәләүгә ҙур өлөш индергән һәм ауыл биләмәһенең социаль-иҡти­сади үҫешендә, йәмәғәт тормо­шонда әүҙем ҡатнашҡан Әлхәт Ғөбәйҙуллин, Иҫке Бәпес мәктә­бе уҡытыусыһы, ауыл биләмәһе депутаты, ауыл биләмәһенең социаль-иҡтисади үҫешендә, йәмәғәт тормошонда әүҙем булған Эльвира Хәмиҙуллина бүләклән­де. Ауылдың иң оло кешеләре Кәшфулла Хөснетдинов, Мәрүәр Ишморатова, Зөләйха Ғөбәйҙул­лина, Рима Абдуллиналар иҫтәле­кле бүләктәр менән билдәләнде. Бергә оҙаҡ ғүмер кисергән ғаилә парҙары -Рәсилә һәм Ғабделхай Абдуллиндар, Гөлнур һәм Өлфәт Сәйфуллиндар, алтын юбилейын үткәреүсе Рәмил Хәмиҙуллин да иғтибарҙан ситтә ҡалманылар.

Бөгөнгө көндә махсус хәрби операция башланыу менән ир-егеттәр Тыуған ил һағына баҫҡас, Иҫке Бәпес ауылы биләмәһенән дә ҡырҡлап кеше унда ҡатнаша. Әле­ге көндә ҡыҫҡаса ялда булған Фуат Хәсәнов, Азамат Хәлитов та сарала тәбрикләнде.

Был байрамды әҙерләгәндә төҙөкләндереү эштәрендә, өмәләрҙә ҙур ярҙам күрһәткән Альберт Янбаевҡа, Илдар һәм Ғәйфулла Хөснетдиновтарға, Венер Абдул­линға, Ғәлимйән Ғәйнуллинға, Ра­уил Сәйфуллинға, Рәмзил Ғөбәй­ҙуллинға, Рәйсә Ғәлимоваға, Наил Сәйфуллинға, Ләйсән Ирмәко­ваға, Рәиф Хәлитовҡа, Рида Ғи­маловаға ҙур рәхмәт әйтелде һәм бүләктәр тапшырылды.

Осрашыу минуттары бүләк ит­кән тантана йыр-моң, уйын-көлкө менән үрелеп барҙы. Сәхнә оҫта­лары моңло йырҙар, сағыу бейеү бүләк итте. Шулай уҡ байрамды моңло йырҙары менән биҙәргә кил­гән Башҡортостандың атҡаҙанған артисы Миңзифа Исҡужина ха­лыҡҡа моңло йырҙарын бүләк итте.

Шулай уҡ майҙансыҡтарҙа уҡтан атыу буйынса оҫталыҡ дәрестәре, тоҡ кейеп йүгереү һәм башҡа уйындар ойошторолдо. Ә балаларҙы аниматор уйнатты.

Халыҡ ҡунаҡтарҙы мул табын, милли ризыҡтар менән ҡаршы­ланы. Артабан яңыбишауылдар осрашыуҙа ҡатнашыусыларҙың ба­рыһын да тәмле былау, самауырҙа ҡайнаған хуш еҫле сәй һәм милли ризыҡтар менән һыйланы.

Ауылдаштарҙы, дуҫтарҙы, туғандарҙы бергә туплап, күрештер­гән, осраштырған көн күңелдәрҙә ғүмерлеккә матур хәтирәләр менән уйылыр.

Фәниә СӘЛИМГӘРӘЕВА.

Автор фотолары.

 Таҡтағош

Һағынғанда тыуған төйәгемде,

Баҫып алһа мине моң-һағыш,

Дауа алыр өсөн һиңә ҡайтам,

Тыуған ауылҡайым, Таҡтағош.

Туйып булмай һулап саф һауаны,

Шәрбәт кеүек шишмә һыуҙары.

Йүкәләргә аҡ бөркәнсек ябып,

Яҙҙы туйлай урман буйҙары.

Йырлы бында туғай, һәр сауҡалыҡ,

Быуаһына төшкән пар аҡҡош -

Тәбиғәттең бөтә хозурлығы

Йыйылғандыр һиндә, Таҡтағош!

Йәмле яҡтарымдың үҙе төҫлө

Йәшәй һиндә матур кешеләр -

Ағинәйҙәр, олпат олатайҙар,

Ауылдаштар, дуҫтар, күршеләр.

Төпкөл тимәй улар ауылымды,

Ожмах түре күреп хөрмәтләй,

Йәшәүҙең дә бөтә йәмен, тәмен

Тоя белеп тырыш хеҙмәттә.

Йөҙ йыл тора Ерҙә ауылҡайым -

Көтһөн уны алда мул тормош.

- Киләсәгең яҡты булһын, тиеп,

Беҙ теләйбеҙ һиңә, Таҡтағош!

Фәрғәт ҠОТЛОБАЕВ.

Эльвира ХӘМИҘУЛЛИНА, ауыл старостаһы:

- Осрашыуға халыҡ бик теләп әҙерләнде. Һәр кем байрамды ҡаршылап, үҙ донъяһын матурланы. Кешеләр йорт-ҡураһын, ихатаһын, кәртәләрен төҙөкләндерҙе, яңыртты, буятты. Һәр ғаилә осрашыуға етди әҙер­ләнеп, дәрт менән эште атҡарып сыҡты. Әйткәндәй, быйыл хатта тәбиғәтебеҙҙе йәмләп, быуабыҙҙа аҡҡо­штар ҙа төйәкләне.

Сараны ойошторған, үткәреүҙә ярҙам иткән муни­ципаль район, ауыл биләмәһе хакимиәттәренә һәм ха­лыҡҡа ҙур рәхмәтемде еткерәм. Артабан да берҙәм һәм бергә булайыҡ.

Рәмилә Сәйфуллина:

- Тыуған ауылымды һағынып Илеш районынан ҡайт­тым. Бала саҡ хәтирәләре, атай-әсәйем хаҡында яҡты иҫтәлектәр һаҡланған ерем бик тә ҡәҙерле. Бында байтаҡтан күрмәгән туғандарымды, ауылдаштарым­ды осраттым. Ошондай матур байрамды ойошторған яҡташтарыма ҙур рәхмәт. Йәшәгән еремә рухи көс алып ҡайтасаҡмын.

Ғабделхай Абдуллин:

- Бик матур ауылдаштар осрашыуы булды. Күңелгә рәхәт булып китте. Күп йылдар күрмәгән ауылдашта­рым да килгәйне. Ҡайта алмағандар араһында хәҙер үкенес белдереп шылтыратыусылар ҙа бар. Быға, әл­биттә, һауа торошо сәбәпсе булды. Ямғыр яуғылап торһа ла, байрам шул тиклем шәп үтте.