Бөгөн – Халыҡ-ара интернет көнө
Дуҫ та, дошман да булыуы мөмкин
Интернет көнө – ул интернет-технологиялар өлкәһендә эшләүсе белгестәрҙең байрамы ғына түгел, ә шулай уҡ беҙҙең кеүек – эш, ял, ҡыҙыҡлы һәм әүҙем тормоштоң бер өлөшө булып өлгөргән бик күп ҡулланыусыларҙыҡы ла.
Хәҙерге көндә интернет киңлектәрендә гиҙмәгән бер кем дә юҡтыр. Барыбыҙ ҙа уға бәйлебеҙ, хатта, унһыҙ йәшәй ҙә алмайбыҙ шикелле. Һәр нәмәнең кеүек, интернеттың да яҡшы һәм шулай уҡ насар яҡтары бар, әлбиттә. Бер яҡтан, унда үҙеңә кәрәкле барлыҡ мәғлүмәтте таба алһаң, икенсе яҡтан, мутлашыусылар тоҙағына ла эләгеүең бар. Әле һөйләшә лә, атлай ҙа белмәгән сабыйҙың да телефондан үҙенә кәрәкле мультфильмды табып ҡуя белеүенә лә күптән инде аптырамай башланыҡ.
Эйе, бөгөнгө йәшәйешебеҙ интернет селтәре менән тығыҙ бәйләнгән. Бик күптәр өйҙә ултырып ҡына, интернет аша аҡса эшләй, ә балалар уның ярҙамында белем ала, аң һәм фекерләү ҡеүәһен үҫтерә. Бәғзе берәүҙәр тап ошо интернет аша үҙ парҙарын, мәңгелек йәрҙәрен осратып ҡауышалар. Кемдәрелер уңып, ҡайһылары туңып та ҡуя, ҡыҙғанысҡа.
Таныш-белештәр араһында ла ундайҙар осрап ҡуя. Сит ил кешеһе менән бәхетле пар булып йәшәүселәр ҙә етерлек.
- Хәҙерге ваҡытта интернет селтәре аша танышыу йышайҙы. Ҡайҙа ғына ҡарама “Танышыу” төркөмдәре күп. Нисек инде интернет аша үҙ мөхәббәтеңде табырға һәм нисек быны мөхәббәт тип әйтергә була? Шуныһын ғына аңламайым. Мәҫәлән, йөрөгән ҡыҙың менән күрешергә өлгөрмәгән саҡта интернет аша яҙышып алырға мөмкин. Донъяла шул хәтлем мәкерле әҙәмдәр ҙә бар икәнен онотмаһындар ине. Интернет аша яҙышыусы ысын кешеме әллә заманса әйтмешләй “фейк”мы икәнен белеп тә булмай бит, - тип аптырауға ҡала бер танышым.
- Ә мин бына тормош иптәшем менән социаль селтәр аша таныштым. Аллаға шөкөр, бына ун йыл инде матур итеп донъя көтәбеҙ. Улыбыҙ һәм ҡыҙыбыҙ бар. Интернетҡа рәхмәт уҡып ҡына торабыҙ, - тип ҡыуана икенсе танышым.
Нимә генә тимә, барыбер был глобаль ау ҙур көскә эйә. Унһыҙ тормошобоҙҙо күҙ алдына ла килтерә алмайбыҙ. Эштә лә, өйҙә лә, юлда ла кәрәк ул беҙгә. Интернетһыҙ беҙ тере ҡулһыҙ ҡалабыҙ ҙа ҡуябыҙ. Интернет-магазиндарҙың һәм башҡа интернет-сервистарҙың хеҙмәттәре менән хәҙер ауыл халҡы ла рәхәтләнеп ҡуллана.
Ғөмүмән, мәғлүмәт һәм белемдәр хазинаһының беҙгә дуҫ йә дошман булыуы бары тик үҙебеҙҙән генә тора. Был турала бер нисә яҡташыбыҙ ҙа һөйләй.
Сәлиха СОЛТАНГИЛДИНА, Бишауыл-Уңғар ауылы, 71 йәш:
- Интернеттың яҡшы яҡтарын һанап та бөтөрлөк түгел, әлбиттә. Әллә ҡасандан күрешмәгән, һөйләшмәгән класташтарҙы, таныштарҙы табып, улар менән аралашырға мөмкин. Көн һайын тиерлек дуҫтар-туғандар менән бәйләнештәбеҙ. Шулай уҡ уның минустары ла бар. Элек балалар күмәкләшеп йыйылышып, көндәр буйы саф һауала уйнай торғайнылар. Урам гөрләп тора ине. Хәҙер күбеһенсә йә телефон тотоп, йә компьютер артында ултыралар. Дәрестәрен дә интернеттан ҡарап ҡына эшләп ҡуя ҡайһы берәүҙәр. Бына шуныһы борсоуға һала. Ә мутлашыусылар кеше алдап, аҡса таларға ла оялмайҙар. Шундай интернет заманында йәшәйбеҙ бит, нишләйһең инде. Бына һеҙҙең менән дә интернет аша аралашабыҙ бит. Ул булмаһа, һеҙ мине, мин һеҙҙе белмәҫ тә инем, бәлки. Ураҙа айында һеҙҙән рәхмәт һүҙе алып ҡыуанып ултырам. Был да шул интернеттың көсө.
Альбина ХӘКИМОВА, Ҡырмыҫҡалы ауылы, Өфө дәүләт нефть техник университетының 1-се курс студенты:
- Студенттар, бигерәк тә, беҙҙең кеүек архитектура-төҙөлөш факультетында белем алыусылар өсөн интернеттың файҙаһы сикһеҙ. Уҡыу процесында кәрәкле барлыҡ стандарттар, ГОСТ- ар тураһында мәғлүмәтте интернеттан ғына табырға була. Шулай уҡ таныштар, класташтар, дуҫтар, туғандар менән аралашыу өсөн дә ныҡ ҡулайлы ул. “WhatsApp”, “ВКонтакте” һәм башҡа социаль селтәрҙәрһеҙ нимә эшләр инек икән? Уҡыу барышындағы барлыҡ яңылыҡтарҙы ошо чаттар аша белеп торабыҙ. Ял иткәндә йә юлда барған саҡта интернет аша йәнең теләгән йырҙы табып тыңларға мөмкин. Йәштәр өсөн быныһы ла бик мөһим. Шулай уҡ студенттың аҡсаһы бөтөп китһә, ата-әсәһе тиҙ генә интернет аша картаһына кәрәкле сумманы күсереп тә ҡуя. Ғөмүмән әйткәндә, бөгөнгө көндә интернет – беҙҙең алыштырғыһыҙ ярҙамсыбыҙ, хатта, кәңәшсебеҙ тип әйтергә була.