Уның һөнәре – тормошҡа йәм өҫтәү
Йыл һайын марттың өсөнсө йәкшәмбеһендә йәшәйешебеҙ өсөн үтә мөһим һәм шул уҡ ваҡытта күп мәшәҡәтле, ҡатмарлы һөнәр эйәләре – Торлаҡ-коммуналь хужалыҡ һәм халыҡҡа көнкүреш хеҙмәте күрһәтеү хеҙмәткәрҙәре байрамы билдәләнә. Көндәлек тормошобоҙ, йәшәү шарттары һәм сифаты, кәйефебеҙ ошо тармаҡ хеҙмәткәрҙәренең эшмәкәрлегенә, уларҙың үҙ бурыстарын нисек үтәүенә туранан-тура бәйле.
Мәҡәләбеҙ геройы – Марина Звоненко 2001 йылдан алып “Йосопов” коммуналь хужалығында дөйөм һорауҙар буйынса етәксе урынбаҫары булып эшләй. Ҡырмыҫҡалының 2-се һанлы мәктәбендә белем алғас, бала саҡтан үҙ иткән бухгалтер һөнәрен үҙләштерә ул. Артабан “Салауат” исемендәге колхозда, Ҡырмыҫҡалы ауыл советында һәм “Водолей” йәмғиәтендә тәжрибә туплай.
Әйткәндәй, Марина Звоненконың ата-әсәһе лә ғүмер буйы район үҙәгендәге торлаҡ-коммуналь хужалығында эшләгән.
- Атайым Александр Федорович Звоненко коммуналь хужалыҡтың тәүге етәксеһе булды һәм был вазифаны 20 йылдан артыҡ башҡарҙы, ә әсәйем Антонида Николаевна оҙаҡ йылдар шунда уҡ штукатур-маляр, төҙөлөш бригадаһы бригадиры булып эшләне. Бала саҡтан атай-әсәйемдең эшен күреп үҫкәс, был өлкәләге хеҙмәт миңә яҡшы таныш, - ти Марина Александровна был турала.
Коммуналь хеҙмәткәрҙәр район үҙәге урамдары йәмле һәм төҙөк булһын өсөн көн- төн тип тормай тырыша. Юлдарҙы ҡарҙан таҙартыу эше лә тулыһынса улар иңендә. Марина Звоненко ошо эштәрҙең барыһы ла ваҡытында һәм тиҙ арала башҡарылыуы өсөн яуаплы.
- Барлыҡ мәғлүмәтте бер урынға туплайым. Һәр ялыуға ваҡытында яуап биреү, мөрәжәғәттәрҙе эшкәртеү, техникаларҙы тейешле урынға йүнәлтеү ҙә минең өҫтә. Ҡар яуған ваҡыттарҙа тәүлек әйләнәһенә эшләргә тура килә. Эшең үҙеңә оҡшаһа, уның бер ауырлығы ла һиҙелмәй.
Татыу коллективыбыҙҙа ҡырҡтан ашыу кеше хеҙмәт итә. Утыҙға яҡын техникабыҙ бар. Әлбиттә, тынғыһыҙ хеҙмәтебеҙҙең бөтә ауырлығы үҙ эшен яҡшы белгән, шул уҡ ваҡытта изге күңелле һәм алсаҡ булып ҡала белгән етәксебеҙ Дамир Йосопов иңдәренә төшә.
Байрамыбыҙ уңайынан хеҙмәттәштәремдең барыһына ла ныҡлы сәләмәтлек, тыныс күк йөҙө теләйем, - ти әңгәмәсем.
Үҙен уңған, тырыш хеҙмәткәр итеп танытҡан ике ул әсәһе эшендә лә, йәмәғәт эштәрендә лә, өйөндә лә өлгөрә. Буш ваҡыттарында баҡса үҫтерергә, ҡул эштәре менән булышырға ярата. Уның лайыҡлы хеҙмәте байтаҡ Маҡтау ҡағыҙҙары менән бүләкләнгән.
Тормошобоҙға йәм өҫтәүсе һөнәр эйәләренең үҙҙәренең дә тормош юлдары йәмле булһын!
Розалия НАЗАРОВА.
Автор фотоһы.