Сара урман эшсәндәренә арналды

Йыйылыусыларҙы Башҡортостан Республикаһының сәнәғәт, энергетика һәм инновациялар министры урынбаҫары Олег Тыщенко сәләмләне. Ул республика Башлығы Радий Хәбиров исеменән барыһын да байрам менән ҡотланы.

- Был байрамды республиканың 800 предприятиеһы һәм хужалығында эшләгән алты мең хеҙмәткәре билдәләй. Улар ағас әҙерләү һәм урманды тергеҙеүҙән алып ағас эшкәртеү һәм әҙер продукция сығарыу кеүек бөтә йүнәлештәрҙә лә эшләй, - тип билдәләне Олег Андреевич.

- Урман һәм урман ресурстарын һаҡларға, тергеҙергә кәрәк. Барығыҙҙы ла үҫентеләр ултыртыуҙа ҡатнашырға саҡырам. Сара сиктәрендә 4000 ҡарағас үҫентеһе ултыртыу планлаштырыла. Халыҡ әйткәнсә, урман беҙҙе ашата, кейендерә һәм ял итергә мөмкинлек бирә, - тине Башҡортостан Республикаһы урман хужалығы министры урынбаҫары Илгиз Фәтҡуллин.

«Урал урманы» яуаплылығы сикләнгән йәмғиәтенең Директорҙар советы рәйесе Вадим Согияйнен өс йыл элек «Башлеспром» компанияһының сираттағы бите асылды тип һыҙыҡ өҫтөнә алды. «Урал урманы» компанияһы барлыҡҡа килде. Пандемияға һәм санкцияға ҡарамаҫтан, предприятие әүҙем үҫешә.

Рәсми асыу тантанаһында урман тармағындағы иң яҡшы хеҙмәткәрҙәр наградаларға лайыҡ булды.

Байрамға ярашлы, ғәҙәттәгесә, «Урман ҡырҡыусы-2023» республика конкурсы, шулай уҡ спорт ориентирлауы буйынса фестиваль үтте. Был сараларҙа ҡатнашыусылар араһында профессионалдар һәм һәүәҫкәрҙәр, шулай уҡ әүҙем йәштәр бар.

Байрамды ойоштороусылар булып Ҡырмыҫҡалы районы хакимиәте һәм Башҡортостан Республикаһының Сәнәғәт һәм инновациялар министрлығы ярҙамында «Урал урманы» яуаплылығы сикләнгән йәмғиәте һәм «Башлес» яуаплылығы сикләнгән йәмғиәте, Башҡортостан Республикаһының Урман сәнәғәтселәре ассоциацияһы, Башҡортостан Республикаһының Спорт ориентиры федерацияһы сығыш яһаны.

Фото һәм сығанаҡ: karmaskaly-nov.ru

Автор:Гөлдәр Яҡшығолова

https://bashgazet.ru/articles/i-tisad/2023-09-16/sara-urman-eshs-nd-ren-arnaldy-3441201