Ғаилә байрамы матур үтте

Ғаилә байрамы матур үтте

Ғаилә, мөхәббәт һәм тоғролоҡ көнө алдынан район үҙәгенең Аҡкүл паркында йәмле байрам сараһы уҙҙы. Бында оҙаҡ йылдар матур тормош көтөүсе һәм шулай уҡ йәш, өлгөлө ғаиләләр тәбрикләнде, балалар өсөн уйындар, оҫталыҡ дәрестәре, конкурстар ойошторолдо.

 - Был көндө беҙ күп балалы ғаиләләргә, ҡулға-ҡул тотоношоп оҙаҡ йылдар бергә ғүмер иткән парҙарға рәхмәт һүҙҙәребеҙҙе ет­керәбеҙ. Районыбыҙҙағы һәр ғаиләгә именлек, сәләмәтлек, бер-береһен аңлап, татыу ғүмер итеүҙәрен теләй­ем, - тине үҙенең сығышында район хакимиәте башлығы Әлфир Сабиров һәм бүләкләү тантанаһын башланы.

Иң тәүгеләрҙән булып Абдулла ауылынан Сулпан Хәлитова Әлфир Фәрхәт улы ҡулынан “Әсәлек даны “ миҙалы алды. Сулпан һәм Артур Хә­литовтар үҙҙәренең татыу ғаиләһендә биш бала – бер ҡыҙ һәм дүрт ул тәр­биәләйҙәр.

“Мөхәббәт һәм тоғролоҡ өсөн” миҙалын тапшырыу өсөн сәх­нә түренә Ҡырмыҫҡалы ауылында йәшәүсе Мәрйәм һәм Венер Юлда­шевтар саҡырылды. Уларҙың ғаилә ҡороп, бергәләшеп бәхетле ғүмер кисереүҙәренә 50 йыл. Хаҡлы ял­дағы уҡытыусылар ике балаға ғүмер биргәндәр. Әлеге көндә Юлдашев­тарҙы биш ейән-ейәнсәре үҙҙәренең уңыштары менән ҡыуандыра.

Ғаилә булып йәшәүҙәренең юби­лей даталарын билдәләүсе парҙар ҙа сәхнә түренән урын алды. Алтын туй­ҙарын билдәләүсе - Ҡырмыҫҡалынан Таңһылыу менән Фәнил Ғәҙелшиндар һәм Рәхилә менән Рәсүл Сәйфуллин­дар, Шаймораттан Нәсихә менән Ҡа­сим Ҡадировтар, Мөҡсиндән Резеда менән Ғәлимйән Ҡотлогилдиндар, Һәүәләйҙән Мәҙинә менән Филарис Ҡотлоевтар, Мөкәйҙән Шәүрә менән Фәнис Мәхмүтовтар, Һәүәләйҙән Әнисә менән Мөхәрләм Садиҡовтар, Константиновканан Франгиза менән Николай Терехиндар, гәүһәр туйҙа­рын билдәләүсе - Ефремкиндан Алек­сандра менән Алексей Кургиндар, Константиновканан Фәниә менән Миңнулла Нурышевтар бүләкле бул­дылар.

Бөтә Рәсәй “Йыл ғаиләһе” конкур­сының республика этабында ҡатна­шып, район данын яҡлаусы Сихонкин ауылынан Елена һәм Дмитрий Андре­евтар, Константиновканан Анастасия һәм Игорь Григорьевтар, Ҡырмыҫҡа­лынан Наталья һәм Сергей Ефимо­втар, Екатерина һәм Лев Матвеевтар дипломдар менән бүләкләнде.

“Өлгөлө башҡорт ғаиләһе – 2023” республика конкурсында еңеп сыҡҡандары өсөн Нәркәс һәм Ай­нур Хәлитовтарға (Ҡырмыҫҡалы), Рушания һәм Азамат Хәйретдиновтарға (Бишауыл-Уңғар) Бөтә донъя башҡорттары ҡоролтайының 2-се дәрәжә Дипломы һәм район хакимиә­тенең Рәхмәт хаты, ә Илдар Әхмәҙи­ев менән Зарема Вәлиеваға (Ҡырмыҫҡалы) Бөтә донъя башҡорттары ҡоролтайының 3-сө дәрәжә Дипломы һәм район хакимиәтенең Рәхмәт хаты тапшырылды.

Шулай уҡ байрам кисәһендә рай­ондың йәмәғәт һәм мәҙәни тормо­шонда әүҙем ҡатнашҡаны, ғаилә йолаларын һаҡлауға һәм үҫтереүгә ҙур өлөш индергәне өсөн “Өлгөлө башҡорт ғаиләһе – 2023” республи­ка конкурсында ҡатнашыусы Селина һәм Динар Батталовтар (Үтәгән) рай­он хакимиәтенең Рәхмәт хатына эйә булды.

Намыҫлы хеҙмәте, юғары һөнәри­леге өсөн район Советының Маҡтау ҡағыҙына район ЗАГС-ының әйҙәүсе белгес-эксперты Әлиә Хәйҙәрова, Район хакимиәтенең Рәхмәт хаты­на район ЗАГС-ының әйҙәүсе бел­гес-эксперты Регина Кузнецова лай­ыҡ булды.

Байрам сараһы матур концерт программаһы менән тамамланды.

Әйткәндәй, үҙәренең законлы никахҡа инеү көндәрен матур дата - 07.07.2023 менән бәйләргә теләүселәр һаны ла был көндө күп булды: Хәбир һәм Диана, Данил һәм Юлиә, Тимур һәм Миләүшә, Азат һәм Әлиә үҙҙәре­нең никахтарын законлы рәүештә теркәне. Шулай уҡ өс пар иң яҡын туғандары менән бергә генә никах туйҙа­рын үткәрҙе. Махсус хәрби операцияға йыйынған Ринат та ошо көндө һөйгә­не Ләйсән менән сәстәрен сәскә бәй­ләне. Айгөл һәм Радик Фәйзуллиндар ҙа тап ошо көндө никахҡа инде.

Мәскәүҙә эшләгән Галина һәм Марат законлы никахҡа инеү өсөн осраҡлы ғына Ҡырмыҫҡалы ЗАГС-ын һайлаған. Улар әлеге мәлдә республи­ка буйлап сәйәхәт ҡыла. Йәштәргә Республика Башлығы Радий Хәбировтың Ҡотлау хаты тапшырылды.

Әле генә өйләнешкән йәштәр­гә лә, оҙаҡ йылдар бергә татыу ғүмер иткән ғаиләләргә лә именлек, тыныс тормош насип итһен!