Һуғыштың тере шаһиттары

Бөйөк Ватан һуғышы яуҙарында райондан 12834 кеше ҡатнашҡан. Уларҙың 7903 һәләк булған һәм хәбәрһеҙ юғалған, йәғни һуғышҡа киткән һәр өсөнсө һалдат ҡына йортона иҫән әйләнеп ҡайтҡан. Барлыҡ совет халҡы кеүек, кешелек тарихында ҡанҡойғос һәм дәһшәтле һуғышта ҡырмыҫҡалылар шулай ғүмерҙәре менән түләгән. Ауылдарҙа һәләк булған фронтовиктарҙың исемдәре яҙылған мәрмәр плиталар һәм обелисктарҙа бер фамилиялы байтаҡ кешеләрҙе табырға мөмкин, ҡайһы бер ғаиләләрҙән фронтҡа киткән өсәр-дүртәр кеше кире әйләнеп ҡайтмаған. Күптәре имгәнгән һәм таҙалыҡтары ҡаҡшаған йәки ҡайтҡас вафат булғандар. Бөгөн район биләмәһендә 8 Бөйөк Ватан һуғышы ветераны йәшәй.