Бәхет тырыштарға йылмая

Радик Рәжәп улы ошо ауыл­да тыуып үҫһә, Алһыу Фә­нил ҡыҙы күрше Иҫке Бәпестән килен булып төшә. Хәҙер инде Миникәй Яҡуп ҡыҙы менән килен һәм ҡәйнә һымаҡ ҡына түгел, ә әсәй менән ҡыҙ кеүек яҡын кешеләргә әүерелгән улар. Шулай булмай ни, бер ҡыйыҡ аҫтында, бер уйлы, бер маҡсатлы булып 23 йыл татыу ғүмер кисерә ғаилә. Миникәй Яҡуп ҡыҙы йәштәр өсөн кәңәшсе лә, ауыр саҡта ҙур рухи терәк тә. Эйе, фермерлыҡ менән шө­ғөл­ләнеүселәргә ауырлығы ла, һикәлтәләре менән дә осрашырға тура килә. Бер туған Радик һәм Рәйеф Хәлитовтар хәҙер инде 17 йыл фермерлыҡ эшендә. Элекке кол­хоздар бөткәндән һуң, йәш­тәрҙең кемелер ҡалаға күсеп китә, кемдер ситкә йөрөп эшләй. Әммә Хәлитовтар бәхетте ситтән эҙлә­мәй – тыуған яҡтарының баҫыу­ҙарын эшкәртә башлай. 600 гек­тарға яҡын ерҙә иген культуралары үҫтерә улар. Йыл һайын мул уңыш йыйып алып, яҡшы һөҙөмтәләргә ирешәләр. Бының артында күпме хеҙмәт, йоҡоһоҙ төндәр, рухи көс ятҡанын яҡшы аңлап торабыҙ. Бәләкәйҙән атайһыҙ ҡал­ған­ғалыр (Рәжәп Фәтҡулла улы вафат булғанда Ра­дик өс йәшлек кенә булып ҡала), моға­йын, икеһе лә егәрле, маҡ­саттарына ире­шеүсән, ныҡышмал булып үҫә Хәли­товтар. “Ағайым Рәйеф Рәжәп улына ныҡлы терәк булыуы, хәстәрлеге өсөн сикһеҙ рәхмә­т­лебеҙ. Ул атайым урынына ҡалған яҡын кешем, минең өсөн ҙур өлгө”, - ти Радик Рәжәп улы. Мәрхүм булған аталары бөгөн бул­дыҡлы улдары менән ғорурланыр ине, моғайын...
Егет кешегә етмеш төрлө һөнәр ҙә аҙ, тигән кеүек, Радик Хәлитов ниндәй эшкә тотонһа ла, һынат­май. Кәрәк икән, тех­ни­каға йән өрә, ағас эшен дә белә, тимергә лә тотона. Ер эше булыу менән генә сик­лән­мәй, ҡура тултырып мал-тыуар аҫрай – һара­йында үгеҙҙәр һаны 7-8-ҙән дә кәм бул­май.“Ауыл ерендә шунһыҙ булмай, һәр ни­мәгә үҙеңә өйрәнергә тура килә”, - ти ул. Тормош иптәше Алһыу Фәнил ҡыҙы әйте­үен­сә, эште ере­нә еткереп эшләргә, бар нимәне ныҡлы, сифатлы итеп башҡарырға ярата Радик ағай. Быны инде Хәлитовтарҙың донъяһына, йорт-ихатаһына күҙ һалғас та аңлап була: һәр ерҙә тәртип һәм бөхтәлек хакимлыҡ итә.
Һәр ирҙең уңышы артында уның ҡатыны тора, тигән аҡыллы һүҙҙәр бар. Үҙе уңған, үҙе гүзәл, бер һүҙ менән әйткәндә, баҫҡан ерендә ут сәсрәтерлек Алһыу янында Радик һымаҡ тырыш, егәрле булмау мөмкин түгелдер. Алһыу һәр бөтмөр ҡатын кеүек аш-һыуға оҫта, баҡса үҫтерергә ярата. Йәйен уңған хужабикәнең ихатаһы аллы-гөллө сәскәләргә күмелә, йыл һайын уларҙың төрҙәрен яңыртып тора ул. Үҙе үҫтергән йәшелсә-емештәрҙән әҙерләнгән салаттар, һуттар, ҡайнатмалар йыл һайын үҙҙәренә лә, дуҫ-туғандарға күс­тәнәс итеп бирергә лә етерлек була. Әйткәндәй, үҙҙәре асыҡ, киң күңелле булғас, ғаилә дуҫтары күп уларҙың. Бергәләшеп гөрләшеп өмәләр үткәрәләр, республи­кабыҙҙың хозур мөйөштәренә ял итергә йөрөйҙәр.
Тормошта ниндәй генә уңыш­ҡа иреш­кән булһалар ҙа, атай һәм әсәй булған ке­ше­нең төп роле нәҡ балалар менән бәйле. Ал­һыу һәм Радик Хәлитовтар ике балаға ғүмер биргәндәр.
- Радмир улыбыҙ Р.Ғарипов исемендәге республика гимназия-интернатын алтын миҙалға тама­м­лап, әлеге мәлдә ӨДНТУ-ла уҡып йөрөһә, Рушаниябыҙ 7-се класта белем ала. Балаларыбыҙҙы, эшләгәнегеҙ беҙҙең өсөн булһа, өйрәнгәнегеҙ үҙегеҙ өсөн, тип хеҙмәт тәрбиәһе биреп үҫтерергә тыры­шабыҙ, - ти ата-әсә.
Ошо көндәрҙә Алһыу һәм Ра­дик Хәли­тов­тар матур ғүмер бай­рамдарын – юби­лейҙарын билдә­ләй. Үтелгән ғүмер юлына ҡарап, һөҙөмтәләр яһап, тағы ла нығыраҡ дәртләнеп алға ынтылыр мәлдәре әле уларҙың. Шөкөр, ҡыуаныр, тыныс күңел, ҡәнә­ғәт­лек менән йәшәр өсөн барыһы ла бар. Киләсәктә яңынан-яңы шат­лыҡтар өҫтәлеп торһон, ғүмер йомғаҡтары әләгеләй бәхет менән генә тәгәрәһен, иңгә-иң терә­шеп, бар уйлаған уй-маҡсаттарын тор­мошҡа ашырып йәшәргә яҙһын. Алһыу Фәнил ҡы­ҙы­ның тормош иптәшенә бағышлап яҙған шиғыр юлдарында ла ошондай матур, изге теләктәре сағыла.
Боролоп ҡына ҡара әле, зинһар,
45 йәшең ишек ҡаға бит.
Ғүмеркәйҙәр сылтыр шишмә кеүек,
Әкрен генә, шөкөр, аға бит.
45 йәшем бөгөн тулды тип,
Ҡартайырға һис тә ашыҡма.
Киләсәгең һәр саҡ аяҙ булһын,
Сәләмәтлек булһын ҡартлыҡта.
Һинең менән үткән ғүмеремә
Үкенерлек түгел һис ҡасан.
Хоҙай беҙгә иҫәнлектәр бирһен,
Шатлығын да ҡушып бер ҡосаҡ.
Һоҡландырып йәшәйбеҙ беҙ
Һыр бирмәйенсә йәштәргә.
Гел дә шулай дауам итһен
Сал ҡунһа ла сәстәргә!
Бер яҡтан ҡарағанда, минең геройҙарым – ауыл ерендә йә­шәүсе ғәҙәти ғаилә. Икенсе яҡтан - тормошта үҙ урынын тапҡан, матур, күркәм йәшәүҙең серен белгән лайыҡлы замандаш­тары­быҙ улар. Тап улар кеүектәр булған­да ауылдарҙың киләсәге бар.
Эльнара ШАЙМАРҘАНОВА.