Даирә
-15 °С
Болотло
75 лет Победы
Бөтә яңылыҡтар
Байрамдар
3 Декабрь 2020, 15:22

Иҫке Мусаларға уңыштар юлдаш булһын

Иҫке Муса ауылы «Айыҡ ауыл - 2020» бәйгеһенә тәүгеләрҙән булып һәм берҙәм ҡушылды, сөнки улар күптән унда ҡатнашыу теләге менән яна ине. “Ни өсөн беҙҙең ауыл был бәйгелә ҡатнашмаҫҡа тейеш?”, “Әлбиттә, ҡатнашабыҙ һәм еңеп тә сығабыҙ”, - тине ауыл халҡы. Эйе, районыбыҙҙың боронғо һәм ҙур Иҫке Муса ауылында башҡорт рухын, уның йолаларын, кәсебен дауам итеүсе һәр яҡтан да уңған, тырыш һәм матур донъя көткән халыҡ йәшәй. Конкурстың район этабында еңеп сыҡҡандарын белгәс, улар тағы ла сәмләнеберәк республика бәйгеһендә ҡатнашырға әҙерләнә башланы.

Уҙған аҙнала ошо хаҡта рәсми белдереү һәм эшләнгән эштәргә йомғаҡ яһау өсөн ауыл халҡы мәҙәниәт йортонда уҙғарылған сараға дәррәү йыйылды. Килгән ҡунаҡтар фойела урынлашҡан ҡул эштәре оҫталарының күргәҙмәһен ҡараны, мәҙәниәт хеҙмәткәрҙәре башҡорт, татар, рус һәм сыуаш халыҡтарының милли эсем­лектәренең нисек эшләнеүе һәм файҙаһы тура­һында таныштырҙы. “Дармарка” акцияһы сиктәрендә ауыр тормош хәлендә ҡалған, күп балалы һәм аҙ тәьмин ителгән ғаиләләргә ярҙам итеү йөҙөнән йәрминкә лә барыһының да иғтибарын йәлеп итте. Бында аҙ тәьмин ителгән ғаиләләргә буш­лай кейем-һалым, аяҡ кейемдәре һайлап алырға мөмкинлек бул­дырылған.Йыйылышты Иҫке Муса ауыл хакимиәте башлығы Ил­мира Ғәлиәхмәтова асты.- Республикала барған “Айыҡ ауыл” бәйгеһендә күп ауылдар ҡатнашып килгәнен белә инек. Унда ҡатнашыу өсөн ауылыбыҙ бер нисә йыл әҙерлек алып барҙы. Район этабы сиктәрендә айыҡ һәм сәләмәт тормош алып барыуҙы яҡтыртҡан төрлө кә­ңәшмәләр, конкурстар, ак­циялар ойошторолдо, ауыл Со­веты, мәктәп коллективы, ки­тапханасылар, ағинәйҙәр менән әүҙем эш алып барылды. Ошо эштә әүҙем ҡатнашҡан ауыл активына ҙур рәхмәт белдерәм. Бөгөн мин ауылыбыҙҙың район этабында еңеп сығыуын иғлан итәм һәм бының өсөн бүленгән 30 мең һум аҡсаны ауылдың Совет, Урман, Партизан урамдарында яҡтыртыу өсөн тотоноуға риза­лығығыҙҙы һорайым. Артабан беҙҙең алда республика этабында ҡатнашыу бурысы тора, бының өсөн күмәкләшеп пландар ҡо­роп, тағы ла байтаҡ эштәр башҡарып сығаһыбыҙ бар. Киләсәктә бер нисә ғаилә менән эшләү өсөн психолог, нар­ко­логтарҙы йәлеп итергә ниәт­ләйбеҙ, - тине ул.Артабан Илмира Әнүәр ҡыҙы ауылдаштар араһында бәйге сиктәрендә уҙғарылған “Атайҙар менән күңелле”, “Төҙөк йорт-ҡура”, “Иң матур ҡапҡа”, “Иң шәп баҡсасы” конкурстарында еңеп сығыусыларға грамо­талар, район һәм республика матбуғаты яҙмаларына яҙылыу тураһында квитанциялар һәм бүләктәр тапшырҙы. Район хакимиәтенән байрамға саҡы­рылған ҡунаҡ - район Советы рәйесе Ринат Шайбәков ауыл халҡының уңғанлыҡтарына, тырышып донъя көтөүҙәренә һоҡланыуын белдерҙе һәм еңеүҙәре менән ҡотлап, артабан да уңыштар теләне. Ул шулай уҡ Арыҫлан ауылынан 60 йәшлек юбилейын билдәләүсе Афған һуғышы яугиры Роберт Фәх­ретдиновҡа юбилей миҙалын тапшырҙы.- Еребеҙҙә һәр ваҡыт тыныс­лыҡ булһын, әсәйҙәрҙең күҙ йәш­тәре түгелмәһен. Матур тор­мошта донъяға айыҡ ҡараш менән йәшәйек, - тип өндәне ауылдаштарын Роберт Вәсим улы. Сара район Мәҙәниәт һарайының үҙешмәкәр артис­тары Эльмира Муллағолова, Эмиль Һөйәрғолов, Фәрит Яҡ­шығолов, Альбина һәм Артур Юлыевтарҙың йырлы-моңло сығыштары менән үрелеп барҙы. Йыйылыусылар рәхәтләнеп кү­ңел­дәрен рухи яҡтан байытып, фекерҙәр алышып, артабан да ауылды йәмһеҙ һәм насар күренештәрҙән, зыянлы ғәмәл­дәрҙән таҙартырға ниәт ҡуйып таралышты.Гөлсәсәк Бикҡужина.Автор фотолары.
Читайте нас в