Даирә
+18 °С
Болотло
Бөтә яңылыҡтар
Ауылым, ауылҡайым
23 Апрель 2023, 11:18

Ҡарлыманда Ураҙа ғәйете

Быйылғы Ураҙа байрамын Ҡарлыман ауылы халҡы бик әүҙем ҡаршыланы. Иртән-иртүк ауыл өҫтөндә моңло аҙан яңғыраны. Ауылыбыҙҙың дин әһелдәре Зәбир Ҡолғонин, Айҙар Ҡолғонин, Вилдан Хәсәнов тауыш көсәйткес аша тирә-яҡты яңғыратып аяттар уҡыны. Ә инде ҡояш сығыу менән хужабикәләр байрам табынына әҙерлек башланы. Күптәре үҙҙәре әҙерләгән тәм-томдарҙы күстәнәс итеп алып килде. Махсус урында усаҡта былау бешә. Ләкин Ураҙа ғәйетенең төп маҡсаты - намаҙ, доғалар ҡылыу, аяттар уҡыу, вәғәз тыңлау. Тәғәйенләгән сәғәттә мәсеткә йыйылған ауылдаштар намаҙға баҫты. Һуңынан имам-хатиб Зәбир хәҙрәт вәғәз һөйләне һәм байрам менән ҡотланы.

Ҡарлыманда Ураҙа ғәйете
Ҡарлыманда Ураҙа ғәйете
Ауыл старостаһы Нур Ғәҙелшин, мәғариф уҙаманы Клара Абакачева, предприятие директоры Илдар Исхаҡов, Вилдан хәҙрәт Хәсәнов, әүҙем йәмәғәтсе Зөлфәр Хөсәйенов барыһын да байрам менән ҡотланы, ойоштороусыларға рәхмәт әйтте, алдағы йылда ла байрамдарҙы бергәләп матур ҡаршыларға саҡырҙы.
Әйтергә кәрәк, һуңғы йылдарҙа мәсетебеҙ әүҙем эшләй, йома намаҙҙары үткәрелә, ғәрәп телен, Ҡөръән серҙәрен өйрәнеү буйынса дәрестәр үтә. Шуныһы ҡыуаныслы - йәштәр мәсеткә киләләр, күңелдәрен иман нуры менән байыталар.
Ауылыбыҙҙа Рамазан айында ураҙа тотоусыларҙың күбәйеүе бигерәк тә һөйөнөслө. Шуға ла байрам улар өсөн айырыуса тантаналы булды. Өйҙәрҙә ай буйы ифтар мәжлестәре, Ҡөръән аштары уҙғарылды.
Быйылғы Ураҙа байрамына йөҙҙән ашыу кеше килде, байрам табыны артында күңелгә яҡын һөйләшеүҙәр, тулҡынландырғыс осрашыуҙар булды. Ураҙа ғәйетенең сығымдарын үҙ өҫтөнә ауылыбыҙҙың килене, шәхси эшҡыуар Альбертина Ғәҙелшина алды. Зөлфәр Хөсәйенов, Минзилә Абакачева, Вәсимә Хөсәйенова, Розалия Ҡолғониналар йүгереп йөрөп табын ҡорҙолар, ауылдаштарын һыйланылар.
Ошо дини байрам ауыл халҡын беректергән, берләштергән, яҡынлаштырған сара булып күңелдәрҙә ҡалды.

Фәрғәт Ҡотлобаев.
 
Автор:Гульчачак Алачева
Читайте нас: