Өйрәк бәпкәләрен нисек ашатырға?

Бишенсе тәүлектә «үти-үти»ләр менюһына майһыҙ эремсек (бер башҡа 4 грамм самаһы иҫәбенән), шулай уҡ кесерткән, клевер һәм бәпембә япраҡтары (ваҡлап туралған) кертелә. Аҙналыҡ өйрәктәр бешерелгән тамыразыҡтарҙы (иҙелгән бәрәңге, кишер) әҙ-әҙләп сүпләштерә башлый. Ә инде ун көн самаҙы уҙғас, бәрәңге, кишер, сөгөлдөр ҡабығына, кәбеҫтә ҡалдыҡтарына (сей килеш тә, бешкән килеш тә), йомортҡа ҡабығына күсерелә.

Бәпкәләр менюһына шулай ук витаминлы һәм минераль өҫтәмәләр: һөйәк оно, ваҡланған ҡабырсыҡтар, аҡбур, балыҡ майы ла кертелә.

Ә инде уларҙы ашатыуҙың йышлығы былайыраҡ булһа әйбәтерәк:

бер аҙнаға тиклемге бәпкәләрҙе – тәүлегенә 8 тапҡыр;

15 көнгә тиклем – 7 тапкыр;

30 көнгә тиклем – 6 тапкыр;

50 көнгә тиклем – 5 тапкыр ашатырга.

Өйрәктәрҙе 50 – 55 көнгә тиклем үҫтереп һуйыу отошлораҡ икән.

Ә инде урамда йөрөтөп кертеүгә килгәндә, бер аҙналыҡ бәпкәләр 40 минут самаһына иркенгә сығарыла. Ун ике тәүлектән һуң – көнөнә дүрт тапҡыр сәгәт ярымға. 20 көн булгас, өйрәктәр көн оҙон урамда йөрөй.

Гөлсәсәк Аласова.