Йомғаҡ яһалды, пландар билдәләнде

Йомғаҡ яһалды, пландар билдәләнде

Район ҡулланыусылар йәмғиәте үҙҙәренең пайсылары менән йыйылыш үткәрҙе. Унда 2023 йыл йомғаҡта­ры, 2024 йылға пландар һәм башҡа һорауҙар ҡаралды.

Отчет йыйылышта Башпотребсоюз идараһы рәйесе Венер Ильясов һәм район ха­кимиәте башлығы Әлфир Са­биров ҡатнашты.

Иң тәүгеләрҙән булып һүҙ алған район ҡулланыусылар йәмғиәте Советының рәйе­се Рәүис Хажиев үткән йылға финанс-хужалыҡ эшмәкәрлек һәм пайсыларҙың наказдарын үтәү буйынса отчет тотто. Ар­табан сығыш яһаусыларҙың барыһы ла район ҡулланыусы­лар йәмғиәтенең алдынғылар рәтендә барыуына баҫым яһа­ны. Ысынлап та, предприятие бик күп күрһәткестәр буйынса алдынғылыҡты бирмәй. Әле­ге көндә бында тәүлегенә 12 тонна икмәк-ҡалас һәм 500 килограмм кондитер изделиелары етештерелә. Шулай уҡ улар 100-ҙән ашыу төрлө һәм сифатлы продукция сығары­ла. Бында етештерелгән аҙыҡ- түлек республиканың барлыҡ төбәктәрендә танылыу алған. Үҙ эштәрен яратып башҡары­усы хеҙмәткәрҙәр көнө-төнө хуш еҫле, тәмле ризыҡтары менән ҡулланыусыларҙы ҡыу­андыра. Был турала үҙҙәренең сығыштарында Венер Зәки улы һәм Әлфир Фәрхәт улы ла бәйән итте.

- Һәр ерҙә хужа кеше үҙе янып торорға тейеш. Бына шул ваҡытта ғына эш алға бара. Был яҡтан беҙҙең Райпо уңды. Рәүис Әбүзәр улы пред­приятиены аяҡҡа баҫтырҙы, алдынғылар рәтенә сығарҙы. Уны һәм шулай уҡ бында эшләүсе уңған хеҙмәткәрҙәрҙе тәрбиәләгән ата-әсәләренә рәхмәт. Ҡасандыр таҡта сәй­ҙәрҙе бүлеп кенә бирһәләр, хәҙер магазин кәштәләрендә йәнең теләгән аҙыҡ-түлек бар, - тигән ялҡынлы телмәр тотто Әфҡәт Ниғмәтуллин һәм бер аҙ элекке заманаларҙы хәтергә алды.

- Әфҡәт Мәүләмбирҙе улы ике көнгә бер булһа ла мага­зинға инеп сыға. Берәй нимә етешмәһә, шунда уҡ миңә шылтыратып иҫкәртә, үҙенең эшлекле тәҡдимдәрен әйтә. Ғөмүмән, ул бар ергә лә өл­гөрә. Үҙе – ауыл муллаһы ла, Ветерандар советы рәйесе лә. Һәр бер сарала әүҙем ҡатнаша һәм үҙе лә ойоштора, - тине Рәүис Әбүзәр улы 89 йәшлек хеҙмәт уҙаманы тураһында.

Сараның иң тантаналы өлөшөндә бүләкләнеүселәр байтаҡ булды.

Шайморатов ауылы коопе­ратив участкаһы рәйесе Әфҡәт Ниғмәтуллин, “Ҡырмыҫҡа­лы” ҡулланыусылар йәмғиәте кассиры Рәйсә Ғәҙелшина, “Ҡырмыҫҡалы икмәк комби­наты” экспедиторы Альбина Мусина Бапотребсоюздың, ә Ҡырмыҫҡалы икмәк пекар­няһы мөдире Гөлшат Бакиро­ва муниципаль район Советы­ның Почет грамоталарына эйә булды. Шулай уҡ “Ҡырмыҫҡа­лы” ҡулланыусылар йәмғиәте хеҙмәткәрҙәре Юлия Зайце­ва – “Иң яҡшы икмәк беше­реүсе”, Николай Дмитриев – “Иң яҡшы водитель”, Иҫке Бәпес магазины мөдире Рәйсә Ғимранова – “Иң яҡшы һаты­усы”, “Уют” ҡулланыусылар кооперативынан Флүрә Баҡы­ева – “Иң яҡшы ашнаҡсы” дәрәжәләре алды.

Ҡырмыҫҡалы ҡулланыу­сылар йәмғиәте Советы һәм беренсел профсоюздар ойош­маһының Почет грамоталары менән “Ҡырмыҫҡалы” ҡулла­ныусылар йәмғиәте водителе Закир Сәфәрғәлиев, икмәк бешереүсе Зилә Ураҙғолова, Үтәгән магазины мөдире Зөл­фиә Сөләймәнова, Шаймора­тов ауылы һатыусыһы Гүзәл Лотфуллиналар бүләкләнде.

Райондың иң алдынғы предприятиеһына алдағы көн­дәрҙә лә тик уңыштар ғына йылмайһын.