Сөбхәналлаһ, күҙ теймәһен, бына бәхет ҡайҙа ул!

Сөбхәналлаһ, күҙ теймәһен, бына бәхет ҡайҙа ул!

Ҡалала тыуып үҫеп тә, ауыл тор­мошона мөкиббән китеп ғашиҡ булған кешеләр менән һоҡланмау мөмкин түгел. Иҫке Муса ауылын­да йәшәгән Гүзәл Ғөзәйерова тап шундайҙарҙан.

Гүзәл Стәрлетамаҡ ҡалаһында тыуып үҫкән. Мәктәпте тамамлағас, медицина колледжына уҡырға инә. Шәфҡәт туташы һөнәре алған ҡыҙ ошо уҡ колледждың фармацевти­ка бүлегендә белем алған Иҫке Муса ауылы егете Айгизәр Ғөзәйеров менән танышып, ауылға килен булып төшә.

Ауыл фельдшеры, Гүзәлдең ҡәй­нәһе Әлмира апай Ғөзәйерова килене менән тәү тапҡыр күрешеүе хаҡында:

- Улыбыҙ буласаҡ киленде күрһә­тергә алып ҡайтҡанда, беҙ силос ташып йөрөй инек. Гүзәл күп тә уй­лап торманы, силос ташлай башланы. Ҡалала үҫкән ҡыҙҙың ауыл эшен бел­гәненә һәм оҫта ғына башҡарғаны­на иҫебеҙ китеп, оҙаҡ ҡына аптырап ҡарап торҙоҡ. Шул уҡ көндө аҙбарға инеп, мал да ҡарашты. Шөкөр, киле­небеҙҙе тәү күреүҙән оҡшаттыҡ, - ти.

- Эйе, ҡалала үҫһәм дә, йәйге ка­никулдарымды ауылда, өләсәйемдә үткәрҙем. Бала саҡтан ауылдағы бар­лыҡ эштәрҙе яратып башҡарҙым. Би­герәк тә бесән эшләү мәлен яратам. Һигеҙ йәштән һыйыр һауырға өйрән­дем, - тип дауам итте һүҙҙе Гүзәл.

Иҫке Муса ауылына килен булып төшкәс тә, фельдшер-акушер пунктына шәфҡәт туташы булып эшкә урынлаша ул. Бына инде биш йыл буйы ҡәйнә менән килен ҡулға-ҡул тотоношоп бергә эшләйҙәр.

- Бала саҡтан шәфҡәт ту­ташы булырға хыялландым. Биш йәшемдә үк әсәйемә был турала әйтеп ҡуйҙым һәм ошо маҡсатыма ирештем, - ти ул үҙенең яратҡан эше тураһында.

Һәр саҡ алдына ҡуйған маҡсатына табан барған ҡыҙ Башҡорт дәүләт университе­тының дауалау физкультураһы һәм реабилитация факульте­тында юғары белем алыуға өл­гәшә.

Гүзәл менән Айгизәр Ғөзәйеровтар ғаиләһе шулай уҡ фермерлыҡ эше менән дә шөғөлләнәләр. Бөгөнгө көндә уларҙың 7 һыйыры, күп кенә үгеҙҙәре, быҙауҙары, һарыҡта­ры, бройлерҙары бар.

Иртә таңдан тороп, эшкә киткәнгә тиклем һәм эштән ҡайтҡас та Гүзәл һыйырҙары­ның һөтөн эшкәртә. Ниндәй генә һөт ризыҡтары әҙер­ләмәй ул! Гүзәл әҙерләгән йо­гурт, эремсек, ҡорот, ҡатыҡ, кефир, Адыгей сыры, ҡуйыр­тылған һөт, ҡаймаҡтарҙы бер тәмләп ҡараған кешеләрҙең барыһы ла уларҙың даими клиенттарына әүерелгән. Һөт ризыҡтарының барыһын да үҙе эшләргә өйрәнгән.

Әҙер продукцияны һатырға Гүзәлдең ҡайныһы Наил Ғөзәйеров ярҙам итә.

Ауылда эшләгән медици­на хеҙмәткәрҙәренең эшен һанап та бөтөргөһөҙ. Гүзәл дә ҡәйнәһе менән бергә ҡартын да, йәшен дә, яңы тыуған са­быйын да хеҙмәтләндерә. Улар бергәләшеп диспансериза­ция үткәрә, анализға ҡан ала, төрлө профилактик эштәр башҡара, ЭКГ һәм прививка­лар эшләйҙәр.

- Эшемде шул тиклем ныҡ яратам. Нәҡ ошо һөнәрҙе һайлауым өсөн ҡыуанып бөтә алмайым. Бала саҡтан эш һөй­өп үҫкәс, бер эштән дә ҡурҡ­майым. 13 йәштән үҙ аллы аҡса эшләү теләге менән иҙән йыуырға эшкә урынлаштым. Әсәйем беҙгә – өс балаға бөтә эштәрҙе лә өйрәтте. Был ирҙәр эше тип ҡарап тормай­быҙ, апайым да, үҙем дә һәр эште эшләйбеҙ ҙә ҡуябыҙ. Медицина хеҙмәткәре булған апайым хатта иретеп йәбеш­тереү эштәрен дә үҙе башҡара. Ағайым менән бергәләшеп мебель йыйырға ла өйрәндек, - тип көлә Гүзәл.

Бөтмәҫ-төкәнмәҫ эштәре араһында Гүзәл баҡса үҫте­рергә, яратҡан ғаиләһе өсөн тәмле аштар әҙерләргә, телде йоторлоҡ бәлештәр бешерергә, селтәр кеүек ҡоймаҡтар ҡойорға ла өлгөрә. Саҡ ҡына буш ваҡыты килеп сыҡһа, си­геү эштәре менән шөғөлләнә, уйынсыҡтар тегә, бисерҙан төрлө биҙәүестәр эшләй. Эшләгән әйберҙәрен һатып та ебәрә.

Декрет ялында ла Гүзәл тик ятмаған. Ауыл клубында балаларға бейеү түңәрәге алып барған, оло йәштәгеләргә фитнес күнекмәләре өйрәт­кән. Сентябрҙән был эшкә тағы тотонмаҡсы. “Был һәлә­тең ҡайҙан килгән?” тигән һо­рауға:

- Музыка мәктәбендә уҡы­ным, бейеү буйынса белем ал­дым, - тип яуаплай.

Һәр эштә әүҙем әңгәмәсем күптән түгел ауылдың барлыҡ велосипедсыларын йыйып алып, марафон ойошторған. Улар күмәкләшеп Зәңгәркүл­гә барғандар, тауға менгәндәр.

Ауыл халҡы йәш килен­де шунда уҡ үҙ иткән. “Үҙеңә генә оҡшап торған килен алғанһың, үҙеңә алмаш була, Алла бирһә”, -ти икән ауыл халҡы Әлмира апайға.

Дүрт йәшлек Арина ла әсәһенән ҡалышмай, гел уның менән бергә йөрөй. Ҡыҙ бала­лар баҡсаһында уҙғарылған бөтә сараларҙа әүҙем ҡатнаша һәм үҙен оҫта бейеүсе, гим­настка итеп танытырға ла өл­гөргән. Өйҙә иһә ул барлыҡ ғаилә ағзаларын гимнастика эшләтә, өләсәһе һәм әсәһенән күреп, төрлө “дауалау курста­ры” үткәрергә лә онотмай.

“Киләсәк тормошоңдо ни­сегерәк күҙаллайһың, ауылдан китергә йыйынмайһығыҙ­мы?” тигән һорауыма:

-Ауыл тормошон ташларға һис ҡасан уйлағаныбыҙ ҙа юҡ. Беҙгә барыһы ла оҡшай. Үҙебеҙгә йорт һалып сыҡтыҡ. Тиҙҙән фельдшерға уҡып алы­рға уйлайым. Ҡыҙым әҙерәк үҫә төшкәс, юғары медицина белеме алырға тигән маҡса­тым да бар әле, - ти Гүзәл.

Эш һөйөүсе ғаилә ты­рышып донъя көтә. Барлыҡ эштәрҙе лә улар бергәләшеп башҡара. Мәҫәлән, Айгизәр аппарат менән һыйырҙарҙы үҙе һауһа, Гүзәл һөттө эшкәр­теү өсөн яуаплы.

Башҡа йәштәр кеүек Ғөзәйеровтарҙың сәйәхәт итергә, донъя күрергә ваҡыт­тары ла ҡалмай.

-Һыйырҙарҙы ҡалдырып китеп булмай шул. Бар нәмәне лә тик үҙем генә эшләп өйрән­гәнмен. Шуға күрә эшебеҙҙе кемгәлер ҡалдырып китеү тураһында уйлап та бирмәй­беҙ. Шулай ҙа ғаиләбеҙ менән үҙебеҙҙең яҡтарҙың йәмле тәбиғәтендә ял итергә, кино­ларға йөрөргә ваҡыт табабыҙ, - ти улар был турала.

Ошондай матур ғаилә менән нисек итеп һоҡланмай­һың инде? Һоҡланырлыҡ шул! Сөбхәналлаһ, күҙ теймәһен, бына бәхет ҡайҙа ул! Йәш ғаиләнең киләсәк тормошо ла тик ҡыуаныслы ваҡиғалар менән генә үрелеп барһын!

Розалия НАЗАРОВА.