“Үҙем - Васька, үгеҙем - Ванька”

Вәсим Кәримов етәкләгән “Вар­шавка” крәҫтиән-фермер хужалығында “Ванька” ҡушаматлы өс йәш тә туғыҙ айлыҡ бер үгеҙ бар икәнен ишеткәс, уның менән та­ны­шырға тип юл тоттоҡ. Шаян холоҡло Вә­сим Фәрит улы: “Мин Васька булһам, үгеҙебеҙ Ванька”, - тип көлдөрөп ҡаршы алды.
Абердин-ангус тоҡомло быҙауҙы “Шай­моратов” тоҡомсолоҡ хужалығынан һатып алған булған. “Ике айлыҡ ҡына сағынан уҡ тәрбиәләйем. Бер һыйырға эйәләшеп, имеп кенә үҫте. Малҡайымдың холҡо кескенәнән бик яҡшы, тыныс булды. Кемдәрҙер үгеҙҙәренә яҡын бара алмаһа, минеке иректә йөрөй, ҡулға ла килә, яраттыра. Фермабыҙҙа 45 һыйыр бар. БР Ауыл хужалығы министрлығы тарафынан “Ғаилә малсылыҡ фермаһын үҫтереү” программаһы буйынса грант ал­ған инек. Һыйырҙарға, нигеҙҙә, яһалма аталандырыу ҡулланабыҙ, әммә был үгеҙ ҙә фай­ҙаланыла. Уның кәүҙәһенең ауыр­лығы бер тонна тарта”, - тип ихлас һөй­ләне фермер.
Форсаттан файҙаланып, яҡташтарға һәм барлыҡ районыбыҙ фермерҙарына Үгеҙ йылында ныҡлы һаҡлыҡ, эштәрендә уңыштар теләне ул.
Ситтән бик тәкәббер булып күренһә лә, “Ванька” ысындан да үҙен бик тыныс тотто. Хужаһы менән бергәләп фото­һүрәткә төшөргәндә лә, төрлөсә баҫып, “позировать” иткәндәй, риза булды.
... Әйткәндәй, дөйөм алғанда, был мал­ҡайҙың ыңғай яҡтары бик күп шул. Бер ҙә юҡҡа халыҡ уны йомартлыҡ, уңыш менән символлаштырмай бит. Һәр кем был йыл­ды туҡлыҡ, аҡыл менән уйланылған йыл тип көтә. Әлбиттә, бар эштәрҙе “мөгөҙ ме­нән ер һөрөп” бик тырышып башҡарып сыҡ­ҡанда ғына ҙур уңыштарға ирешергә мөмкин буласаҡ. Беҙ ҙә киләһе йылда бар проблемалар үтеп, муллыҡ, туҡлыҡ һәм ты­ныс­лыҡ килеүен ҙур өмөт менән көтәбеҙ.
Фәниә Сәлимгәрәева.
Автор фотоһы.