Ауыл фельдшеры сәғәткә ҡарамай

Рәшиҙә Ринат ҡыҙы яҙмыш ҡушыуы буйынса Үзбәкстанда тыуып үҫһә лә, 90-сы йылда ғаиләләре менән ата-әсәһенең тыуған яҡтарына – Башҡортостанға ҡай­тып төпләнәләр.

Мәктәпте яҡшы билдәләргә тамам­лаған ҡыҙ Өфөләге медицина учили­щеһына уҡырға инә һәм 30 йылдан ашыу ғүмерен ошо һөнәргә арнай. 18 йыл Бла­говещен ҡалаһының үҙәк дауаханаһында, 12 йыл Өфөнөң 3-сө балалар табыу йор­тонда эшләп, хаҡлы ялға сыға. Тәбиғәт балаһы һәр ваҡыт тәбиғәткә тартыла тигәндәй, Сәлимгәрәевтар ҙа Алексан­дровканан йорт һатып алып, артабанғы тормоштарын ошонда дауам итәләр.

Ауылда эшләргә фельдшерҙар етмә­гәнлектән, Рәшиҙә Ринат ҡыҙын эшкә саҡыралар. Шулай итеп тәжрибәле ме­дицина хеҙмәткәре “Ауыл фельдшеры” программаһында ҡатнашырға ҡарар итә һәм тағы ла үҙенең яратҡан эшенә – ха­лыҡ сәләмәтләге һағына баҫа.

Бер аҙ Константиновка ауылында фельдшер-акушер булып эшләгәс, бына хәҙер инде өс йылдан ашыу Түбәнге Төкөн ауылының ФАП-ын етәкләй.

Түбәнге Төкөндә йәшәүсе 380 кешене хеҙмәтләндереп кенә ҡалмай ул, Алайғыр табип амбулаторияһында акушер вази­фаһын да башҡара – барлығы 27 ауыл ҡа­тын-ҡыҙҙарының сәләмәтлеген күҙәтә. Шулай уҡ “Сәләмәтлек поезы” менән медицина хеҙмәткәрҙәре булмаған бар­лыҡ ауылдар халҡына диспанлаштырыу үткәреүҙә әүҙемлек күрһәтә.

-Кисә генә Алайғыр зонаһының өлкән фельдшеры Галина Васильевна менән Ефремкин ауылында 29 кеше­не ҡабул иттек. Анализдар алдыҡ, ЭКГ эшләнек, ҡатын-ҡыҙҙарҙың сәләмәтле­ген тикшерҙек. Махсус хәрби операция­ла ҡатнашыусыларға, ветерандарға һәм уларҙың ғаиләләренә даими барабыҙ. Бигерәк тә ошо аяуһыҙ яуҙа яҡындарын юғалтҡан яҡташтарыбыҙға айырыуса ҙур иғтибарыбыҙҙы бүләбеҙ, -тине ул беҙ килгән көндө.

Махсус хәрби операция башланыу менән контракт төҙөп, яу ҡырында яра­ланған яугирҙарға ярҙам итеү теләге менән дә яна мәҡәләм геройы.

-Был теләгемде белдереп бер нисә тапҡыр хәрби комиссариатҡа барҙым. 50 йәштән олораҡ медицина хеҙмәт­кәрҙәрен алмайбыҙ, тип кире бороп ҡай­тарҙылар. Госпиталдә ятҡан яралыларға ике аҙна булһа ла ирекмән булараҡ ярҙам күрһәтеп ҡайтырға тигән хыялымды ба­рыбер бойомға ашырырға уйлайым. Әл­биттә, ҡулыбыҙҙан килгәнсе гуманитар ярҙам ебәрергә ярҙамлашып торабыҙ, тик был минең өсөн аҙ кеүек тойола. Үҙемдең йылы һүҙҙәрем менән дә, дарыуҙар ярҙа­мында ла ауыр яралы һалдаттарҙың хәлен бер аҙ еңеләйткем килә. Районыбыҙҙа йәшәүсе күп кенә фельдшерҙар, сани­тарҙар ҙа ошондай теләк менән йәшәй, сөнки унда медиктар һәм ярҙамсылар етешмәй, -тигән аңлатма бирҙе ул был ҡарарына.

Намыҫлы хеҙмәте өсөн Башҡортостан Республикаһы Һаулыҡ һаҡлау министр­лығының, район үҙәк дауаханаһының Рәхмәт хаттарына, Маҡтау ҡағыҙҙарына эйә булған “Ауыл фельдшеры”:

-Быйыл беҙҙең ауылда ла бөтә уңай­лыҡтары булған модулле ФАП төҙөй­әсәктәр, -тигән ҡыуанысы менән бүлеш­те.

Һөйөклө ҡатын, ҡыҙына наҙлы әсәй, ейәненә яратҡан өләсәй, уңған хужа­бикә һәм үҙ эшенең оҫтаһы булған ханым кәңәштәрен дә еткерҙе:

-Йышыраҡ саф һауала йөрөргә, кү­берәк еләк-емеш, йәшелсә ашарға, һыу эсергә тырышығыҙ. Әйткәндәй, күптәр һыу эсмәй. Уртаса ауырлыҡтағы һәр кеше көнөнә ике литр тирәһе һыу эсергә тейеш. Иртән торғас та ике стакан йылы һыу эсеп ҡуйығыҙ, шунан бер сәғәт үткәс кенә иртәнге аш ашағыҙ. Һуңынан ике сәғәт һайын берәр стакан йылы һыу эсеп торорға кәңәш ителә. Был ашҡаҙанға яҡшы тәьҫир итә. Скандинав таяҡтары менән йәйәү йөрөү ҙә сәләмәтлек өсөн файҙалы. Шулай уҡ алкоголь эсемлек­тәр ҡулланыу, тәмәке тартыу кеүек насар ғәҙәттәрҙән арынырға кәрәк. Әлбиттә, йыл да диспанлаштырыу үтеп, сәләмәт­легегеҙҙе тикшереп торорға онотмағыҙ, - тине ул.

-Фельдшерыбыҙҙан уңдыҡ. Үҙебеҙ онотоп китһәк, һәр ваҡыт үҙе шылтыра­тып, медицина күҙәтеүе үтергә саҡырып тора. Рәшиҙә Ринат ҡыҙына барыһы өсөн дә рәхмәтлебеҙ, -ти сәләмәтлеген тик­шертергә килеүсе Ғәлиә Намаҙғолова.

Эйе, ҡала еренән айырмалы рәүештә, ауылда фельдшер булып эшләү икеләтә ҙур яуаплылыҡ талап итә. Бер үк ваҡытта уларға педиатр ҙа, күҙ табибы ла, хирург та булырға тура килә. Фельдшер-аку­шерлыҡ пунктынан бер ваҡытта ла кеше өҙөлмәй. Шуға күрә ауыл фельдшеры сәғәткә ҡарарға ла онота.

#ПрофсоюзЗдравоохранения

#ПрофсоюзМедработников

#медикиГерои

Розалия НАЗАРОВА.

Автор фотоһы.