Яңы мөмкинлектәр асыла

Яңы мөмкинлектәр асыла

Ошо көндәрҙә район үҙәк дауаханаһының хирургия бүлегендә беренсе тапҡыр үт ташы ауырыуы буйынса лапароскопик операция яһалды.

Был учреждениены “Eleps” фир­маһының Рәсәйҙә етештерелгән за­манса эндовидехирургия стойкаһы менән йыһазландырыу һөҙөмтәһендә мөмкин булды.

Уҙған йыл аҙағында дауаханала был ҡоролма “Сәләмәтлек һаҡлау” милли проекты буйынса урынлашты­рылғайны. Хирургияла аҙ инвазив тех­нологиялар операцияларҙы ҡорһаҡ ҡыуышлығы органдарына инеү өсөн ҙур киҫеүҙәрһеҙ, минималь тишектәр менән башҡарырға мөмкинлек бирә.

Тәүге операцияны юғары катего­риялы табип-хируг Александр Петров, операция шәфҡәт туташы Светлана Әхтәрйәнова үткәрҙе. Операцияла шулай уҡ район үҙәк дауаханаһы та­биптары: табип-анестезиологтар Ва­лерий Буйлов һәм Рим Шәйхисламов, шәфҡәт туташы-анестезиолог Рәсимә Усманова ҡатнашты.

- Район үҙәк дауаханаһының хи­рургия бүлегенә ошондай заманса ап­парат ҡайтыуына бик шатбыҙ. Уның ярҙамында ҡатмарлы операцияларҙы ла еңел үткәреп булыр һәм хирургта­рыбыҙҙың да эше еңеләйер, тип өмөт­ләнәбеҙ, - ти Ҡырмыҫҡалы ауылынан Фәриҙә Ҡасимова.

Район үҙәк дауаханаһында эшләй башлаған һәм әлеге ысулды ҡулланыу тәжрибәһе булған хирургия бригадаһы­ның төп бурысы – хеҙмәттәштәренә яңы эндоскопик ҡоролмаларҙың мөмкинлектәрен күрһәтеү һәм уны көндәлек тәжрибәлә ҡулланыу. Ла­пароскопик методика, алдынғы тех­нологияларҙы ҡулланып, хирургияла имгәнеүҙе кәметергә һәм пациенттың операция өҫтәлендә һәм стационарҙа булыу ваҡытын ҡыҫҡартырға мөмкин­лек бирә.

 Быйыл ғына Башҡортостанда, “Һаулыҡ һаҡлау” милли проектын тормошҡа ашырыуға ярашлы, ете һаулыҡ һаҡлау объекты төҙөлөшө, туғыҙ медици­на ойошмаһында капиталь ремонт, 130-ҙан ашыу тиҙ күтәрелә торған модулле конструкцияны һатып алыу һәм ҡуйыу, дүрт меңдән ашыу медицина ҡорамалын һәм 206 берәмек транспорт һатып алыу

планлаштырылған.

Әйткәндәй, был мил­ли проектты тормошҡа ашырыу – Башҡортостан Башлығы Радий Хәбировтың айырым иғтибар

үҙәгендә.

 Азамат ҒӘЛИЕВ, район үҙәк дауаханаһының баш табибы:

- Был тарихи ваҡиға, элек район дауаханаһында бындай операциялар яһалғаны юҡ ине. «Eleps» лапароскоп аппаратын алыу мөмкинлеге беҙҙең өсөн бик мөһим булды. Был операци­ялар спектрын һәм кимәлен киңәйтә, күләмле асыҡ операцияларҙан ситкә китергә мөмкинлек бирә һәм паци­енттың стационарҙа булыу ваҡытын ҡыҫҡарта һәм уның һауығыу ваҡы­тын тиҙләтә.