Был тарихты "Файҙалы кәңәштәр" төркөмөндә һөйләгәндәр. Гүзәл Ғүмәрова үҙенсәлекле дауалау ысулы тураһында бына нимә тигән:
"Мин, бер ваҡыт баҫҡыстан йығылып, аяғымды ныҡ ҡына йәрәхәтләгәс, Аллаһ Тәғәләнең ярҙамы менән бер ҡатын менән осраҡлы танышып, ул миңә еңел генә дауаланыу ысулын өйрәтте. Күп тапҡырҙар яҙып та сыҡтым инде һорағандарға.
Үҙе ябай, үҙе бер тин аҡса сығармайынса дауаланыу ысулы — ҡырмыҫҡа иләүенә ултырыу. Ул ҡатын, аварияға эләгеп, аяҡтарымды бөртөкләп йыйҙылар, бер йыл эсендә 19 операция эшләнеләр, аҙаҡ профессор ҡырмыҫҡа иләүенә ултыр тип ҡайтарып ебәрҙе, миңә өс тапҡыр ултырыу етте, шунан һауыҡтым, әлхәмдүлиллаһ, тип һөйләгәйне. Мин дә шул ысул менән шифаланып, һеҙгә лә тәҡдим итәм.
Кемдеңдер, ҡырмыҫҡа иләүен туҙҙырып, өйгә алып ҡайтҡан осраҡтарын да ишеткәнем бар, тик улай шифаланам тип, киреһенсә, ҡырмыҫҡаларҙың рәнйешен алырға мөмкин бит. Иң яҡшыһы — үҙеңә урманға барыу. Ҡырмыҫҡа иләүенең өҫтөнә түгел, ситенә генә аяҡты ҡуйып ултырыу ҙә етә. Ҡырмыҫҡалар алмашлап менә бара, шифаларын ебәргәс, төшә бара.
Улар организмда - һөйәктә нимә етмәй, шул матдәне эшләп, бүлеп сығаралар. Һөйәк яңырып китә. Күпме түҙеп ултыра алаһығыҙ (15, 20, 25 минутмы), шул тиклем шифаһы күберәк була.
Минең үҙемә ике тапҡыр барыу етте, сөбхәналлаһ. Аҙған ауырыуҙарға күберәк кәрәктер. Тик көн дә барырға ярамай, ике-өс көндән, аҙнаға бер тапҡыр булһа - бигерәк тә яҡшы, алған дауа яйлап тарала.
Дауаланыр алдынан ихлас күңелдән Аллаһ Тәғәләнән шифаландырыуын һорарға онотмағыҙ, сөнки ауырыуҙы ла, дауаһын да, шифаларын да тик Ул - бөйөк Раббыбыҙ - Аллаһ Тәғәлә генә бирә. Дауаланғас та, "әлхәмдүлиллаһ" - Аллаһ Тәғәләгә шөкөр, рәхмәт тип, рәхмәтегеҙҙе белдерергә онотмағыҙ. Ҡамасаулағаным өсөн һеҙҙән ғәфү үтенәм, биргән дауаларығыҙ өсөн, ҡырмыҫҡалар, һеҙгә лә рәхмәт, тип тә әйтһәгеҙ, үҙегеҙ шифаланыу ғына түгел, сауап та алырһығыҙ, ин шәә Аллаһ. Шифалары тейһен һәр кемгә лә".
Ошо уҡ ысул менән дауаланған Маһинур Йәғәфәрова иһә: "Ике тапҡыр өйлә намаҙынан һуң ике рәҡәғәт нәфел намаҙын уҡып, Аллаһ Раббыбыҙҙан шифа һорап, барып килдем ҡырмыҫҡа иләүенә. Беренсе тапҡыр барыуҙа уҡ яҡшы яҡҡа үҙгәреш һиҙелде. Был шифаланыу ысулын яҙған ханыма ҙур рәхмәт!" - тигән.
Сығанаҡ: https://vk.com/bashkortvk?w=wall-33711741_67070
Айһылыу Хәсәнова фотоһы.
