Кеше ғүмере һәм һаулығы һағында

- Атайымдың тәҡ­­диме бу­йын­­са ме­ди­ци­­на юлынан киттем. Ғаи­ләбеҙҙә ике уҡытыусы, ике ме­дик булырға тейеш, тигәйне ул. Ғаиләлә ете бала булһаҡ, ике апайым уҡытыусы, берәүһе акушерка ине. Шулай миңә медицинаны һайларға тура килде, - тип һөйләне изге һөнәр эйәһе.
Алайғыр ауылы ҡыҙы 1-се һанлы Өфө медицина учи­лищеһына уҡырға инеп, 1987 йылда уҡыу йортон фельдшер белгеслеге буйынса уңышлы тамамлай. Хеҙмәт юлын тыу­ған районға ҡайтып, Ефрем­кин фельдшер-акушерлыҡ пунк­тында фельдшер булып башлап ебәрә. Ике йылдан һуң тыуған ауылындағы дауаханаға өлкән шәфҡәт туташы итеп күсерелә. 1994 йылда инде Шайморатов ауылы егете Илдар Фән улына кейәүгә сыға һәм иренең ауылындағы ул саҡтағы амбулаторияла шәф­ҡәт туташы эшен дауам итә. Шайморатовтар киленле лә, яҡшы белгесле лә була. Байтаҡ йылдар үткәс, амбулатория ФАП-ҡа әйләнә, уның мөдире Фәнүзә Мөхәммәт ҡыҙы пен­сияға китә һәм Гөлнур Фән ҡы­ҙы был вазифала эшләй башлай.
Әлеге ваҡытта уның яуап­лылығында 956 кеше иҫәптә тора. Фельдшер уларҙың барыһының да һаулығы өсөн яуаплы. Балалар, йөклө ҡа­тын­дар, бигерәк тә хроник ауы­рыуҙар уның күҙәтеүе аҫ­тында.
Сабыйҙарға бер йәшкә тиклем патронаж, шулай уҡ уларға һәм өлкәндәргә кәрәк­ле прививкалар яһау, ауыр сир­леләрҙе, сабыйҙарҙы йорттарға барып ҡарау, эш урынында пациенттарҙы ҡабул итеү һәм табип ҡушыуы буйынса килә алмағандарҙың йорттарына барып, уколдар эшләү тора фельдшерҙың бурыс­тарында.
Төрлө ауырыу­ҙарҙан һаҡ­ланыу маҡсатында өйҙән өйгә йөрөп, профи­лак­тик әң­гәмәләр ҙә тынғыһыҙ хеҙмәт эйәһенең иңендә. Йыш ҡына тәүге ярҙам да күрһәтергә тура килә.
Гөлнур Кадаева халыҡ өсөн иң кәрәкле һөнәргә эйә. Ул эшенә ҙур яуаплылыҡ менән ҡарап, пациенттарҙы дарыу, уколдар менән генә түгел, иғтибарлы мөнәсәбәт, яҡты йөҙ, йылы һүҙ һәм файҙалы кәңәштәре менән дә дауаларға ярҙам итә. Аҡ халатлының хеҙмәте ҙур яуаплылыҡ талап итә. Кешеләрҙең ҡайһы ерҙәре ауыртһа ла, улар иң тәүҙә уға мөрәжәғәт итергә тырыша. Ауыл фельдшерының хеҙ­мәте сәғәткә ҡарамай, тәүлек­тең төрлө ваҡыты булыуға ҡарамаҫтан, хатта байрам көндәрендә лә уға шылты­раталар, йә киләләр. Уларҙы сабыр ғына тыңлап, ярҙам ҡулын һуҙырға һәр саҡ әҙер ул.
Төплө белемле, тәжрибәле, иғтибарлы, яуаплы, тырыш, үҙ эшенә бирелгән фельдшерҙы үҙәк район етәкселеге ярҙам өсөн тиҙ ярҙам хеҙмәтенә лә саҡырғас, ризалаша. Меди­цина хеҙмәткәре - хәрби кеше, шуға ла бойороҡ кире ҡағылмай. Бөтмәҫ-төкәнмәҫ мәшәҡәттәр менән тулы тын­ғыһыҙ эшенең бөтә нескә­лектәрен яҡшы белгән фельд­шер ошо һөнәрҙе атаһының теләге буйынса һайлаһа ла, ул был сабырлыҡ һәм мәрхәмәт­лек талап иткән изгелекле һөнәргә яҙмышын бәйләүенә һис үкенмәй.
Йортта, ғаиләлә аңлаусы кеше булһа, эштә, әлбиттә, тыныс күңел менән эшләп була. Тормош иптәше Илдар Фән улы менән оҙаҡ йылдар бер-береһенә терәк һәм таяныс булып йәшәйҙәр. Улар ике бала тәрбиәләп үҫтер­гәндәр. Элена Өфө дәүләт авиа­ция-техник универ­сите­тын тамамлаған, баш ҡалала "Россельхозбанк"та эшләй. Үҙе хәҙер тормошта. Зарина - Өфө эшҡыуарлыҡ, экология һәм дизайн коллед­жының 2-се курс студенты.
Халыҡ һаулығы өсөн көрәшкән һәм янып йәшәгән медицина хеҙмәткәре беҙҙе оҙатҡанда: “Кешеләр сәлә­мәтлектәренә битараф булма­һындар, ваҡытында диспан­серизация үтһендәр, медицина тикшеренеүенең мөһимлеген аңлаһындар ине”, - тип оҙатып ҡалды.
Фәниә Сәлимгәрәева.
Роза Тажетдинова фотоһы