“Дауаханаға һалмайҙар, йүнәлтмә бирмәйҙәр!”

Килене Зарина әйтеүенсә, ҡәйнәһе коронавирус менән сирләй. Үпкәһенең 44 проценты зарарланған, ул етди дауаға мохтаж, әммә дауаханала урын юҡлыҡҡа һылтанып, уны клиникаға һалмағандар.

-Ҡәйнәм Магнитогорскиға барып, үҙ аҡсаһына компьютер томографияһын үтеп ҡайтты. Үпкәһенең 44 проценты зарарланған! Дауаханала урын юҡ, тип уны алмайҙар, Учалыла урын бар - йүнәлтмә бирмәйҙәр! Кешенең ғүмере ҡыл өҫтөндә, пенсионер, укол яһарға кеше юҡ, амбулаторияла ҡабул итмәйҙәр, стационарға һалмайҙар. Кеше ғүмере һуҡыр тин! - тип йәне көйә Заринаның.

Был хаҡта ҡатын социаль селтәрҙә республика етәксеһе битендә хәбәр итә. Һаулыҡ һаҡлау министрлығында Заринаның дәғүәһенә иғтибар иткәндәр. ”Һеҙҙең хәбәрегеҙ ҡабул ителде. Яҡын арала дауаханаға һалынасаҡ,” - тип яуаплаған ведомство вәкиле Таһир Ғиззәтуллин.

Шул уҡ ваҡытта Өфө ҡалаһы дауаханаларында ла хәл көсөргәнешле. Һуңғы ваҡытта һиҙгерлекте юғалтыуыбыҙ, санитария-гигиена ҡағиҙәләрен һанға һуҡмауыбыҙ арҡаһында сир таралыуына юл ҡуйҙыҡ. Дауаханаларҙа урындар арттырыуҙан ғына эпидемиологик хәл яҡшырмаясаҡ, ул нигеҙҙә һәр кемдең яуаплылығына бәйле.

Фото:Ufa1.ru

Автор. Дина Арсланова.