Ҡырмыҫҡалылар программаны әүҙем ҡуллана

 - Беҙ әлеге программаны бер нисә йыл элек өлкән быуын вәкилдәре өсөн булдырырға уйланыҡ. Сөнки уларҙың күбеһенең Башҡортостанда ғүмер буйы йәшәп, республика буйлап йөрөп, уның матурлығын күреп өлгөрмәүен ғәҙелһеҙлек, тип таптыҡ. 2020 йылдан башлап бөгөнгә ҡәҙәр программа бик күп кешене ҡоласланы. Проектта ҡатнашҡан туроператорҙар төрлө маршруттар эшләй – сәләмәтләндереү, музейҙарға һәм иҫтәлекле урындарға барыу һәм башҡалар. Һәр сәфәрҙә ҡыҙыҡлы оҫта­лыҡ дәрестәре планлаштырылған, - тип билдәләне Радий Фәрит улы үҙенең бер сығышында.

Районда “Башҡорт оҙон ғүмерлелеге. Туризм” программаһы нисек тормошҡа ашырыла? Был турала Ҡырмыҫҡалы рай­оны буйынса куратор Эльмир Миһранов менән әңгәмә ҡорҙоҡ.

- Эльмир Радик улы, “Башҡорт оҙон ғүмерлелеге. Туризм” программаһы менән таныштырып китегеҙ әле.

- Был – Эшҡыуарлыҡ һәм туризм ми­нистрлығы, Туризм үҫеше үҙәге, Башҡор­тостан Хеҙмәт, ғаилә һәм халыҡты социаль яҡлау министрлығы, муници­палитеттар ярҙамында пенсионерҙар өсөн ойошторолған социаль турҙар. Төп маҡсат – оло быуын вәкилдәренең һау­лығын нығытыу, социаль әүҙемлек осо­рон һәм ғүмер оҙайлығын арттырыу, ту­ристик объекттар буйлап бер көн йөрөү, Башҡортостандың иҫтәлекле урындарын күреү, мәҙәни һәм тарихи мираҫын өй­рәнеү хоҡуғы биреү. Хаҡлы ялдағылар шулай уҡ Рәсәйҙең башҡа төбәктәре буй­лап сәйәхәт итеү мөмкинлегенә лә эйә.

Проекттың мәҙәни-танып белеү, әүҙем, һауыҡтырыу һәм ҡатнаш тип аталған дүрт төрө бар. Сәфәр өсөн уңайлы шарт­тар – 15 кешенән торған төркөм, 8-10 сәғәтлек тур. Сәфәрҙә гид, хакимиәт вәкиле, медицина хеҙмәткәре оҙатып йөрөй. Турҙа ҡатнашыусылар эсәр һыу һәм мотлаҡ страховкалау менән тәьмин ителә. Программала 55 йәштән өлкән ҡатын-ҡыҙҙар, 60 йәштән уҙған ир-ат­тар һәм хеҙмәт стажы буйынса лайыҡлы ялға сығыусылар ҡатнаша ала. Шулай уҡ хаҡлы ялдағылар “Башҡорт-белорус оҙон ғүмерлелеге. Туризм” программаһы сиктәрендә Беларусь Республикаһына сәйәхәт итә ала. 7-8 көнгә һуҙылған был проектта ҡатнашыу 34400 һум тора. Был хаҡҡа Минск ҡалаһындағы ҡунаҡханала йәшәү, иртәнге аш, трансфер, экскурсия хеҙмәте һәм страховка инә.

- Беҙҙең районда йәшәүсе өлкән быуын вәкилдәре ҡайҙарға сәйәхәт ҡылды?

- Ҡырмыҫҡалылар Красноусол мине­раль сығанаҡтары, страус фермаһы менән танышты. “Башҡорт балы һәм лимон­дар” тигән экскурсия сиктәрендә Өфөлә­ге лимонарийҙа һәм иҫтәлекле урындарҙа булдылар. “Стәрлетамаҡ һәм Торатау ге­опаркы” тип аталған әүҙем-турҙа тарихи урындарға сәйәхәт ҡылдылар. Боронғо сауҙагәрҙәр ҡалаһы – Бөрөнән дә ҙур тәьҫораттар алып ҡайттылар.

- Программала ҡатнашыу өсөн ҡайҙа һәм кемгә мөрәжәғәт итергә була?

- Бының өсөн Ҡырмыҫҡалы ауылы, Киров урамы, 54 б адресы буйынса урынлашҡан Физкультура-һауыҡты­рыу комплексына килергә йәки 2-12-17, 89874830602 телефон һандары буйынса миңә мөрәжәғәт итергә мөмкин. Экскур­сия проектында ҡатнашыу өсөн https:// долголетие.соцтуризмрб.рф/ сайтында теркәлергә, үҙегеҙ өсөн уңайлы маршрут һәм көн һайлап, берәй сәфәргә яҙылырға кәрәк. Сайтта шулай уҡ проект хаҡын­да тулыраҡ мәғлүмәт менән танышырға була. Проект буйынса өлкәндәр йылына бер тапҡыр республика буйынса бер көн­лөк бушлай турға бара ала. 2025 йылдың тәүге ярты йыллығына 150 квота бүленде.

- Хаҡлы ялдағы райондаштарыбыҙ өсөн кәрәкле мәғлүмәттәр менән бүлешкә­негеҙ өсөн ҙур рәхмәт.

Розалия НАЗАРОВА әңгәмәләште.