"ТАБЫН ИЛЕ: ҮТКӘНЕ, БӨГӨНГӨҺӨ, КИЛӘСӘГЕ"

 Ҡор баштары ҡорон Ауырғазы районы муниципаль район хакимиәте башлығы Арыҫлан Шәһәретдинов асып ебәрҙе. Ул изге бишул табындар төйәгенә фестивалгә килгән район делегаттарын тәбрикләп, район халҡының тормошо менән яҡыныраҡ таныштырҙы.

Табын ырыуы берләшәмәһе Советы рәйесе Фәнил Ҡоҙаҡаев ойошманың эшмәкәрлегенә йомғаҡ яһап, артабан да бергә тупланып милләттәштәр алдына ҡуйған бурыстарҙы атҡарып сығарырға өндәне.

Тарих фәндәре кандидаты, доцент, Бөтә донъя башҡорттары ҡоролтайы Башҡарма комитеты аппаратының баш белгесе Нурислам Ҡалмантаевтың сығышы тағы ла бер тапҡыр табындарҙың боронғо Сыңғыҙ ханлығы менән бәйләнгән көндәргә барып тоташҡаны (ХII быуат), ырыуҙаштарҙың Ырымбурҙан алып Татарстан, Силәбе, Ҡурған, Һарытау һәм Һамар ерҙәрендә йәшәгәненә иғтибар итте.

Йыйында милли проекттар, халыҡ ижады аша йәштәргә илһөйәрлек тойғоһон тәрбиәләү идеяһы тураһында ултырышта ҡатнашыусыларға Башҡортостан Республикаһының атҡаҙанған мәҙәниәт хеҙмәткәре Ғимаҙиева Әлфиә һәм «Табын-фест» ойоштороу комитеты рәйесе Марат Бүләков ентекләп һөйләп китте, шулай уҡ иң актив район етәкселәренә, ҡор баштарына ойошма Советы исеменән рәхмәттәрен еткерҙе.

Ҡырмыҫҡалы районы Табын ырыуы башҡорттарының ҡор башы Фәрғәт Ҡотлобаев «Табын ырыуы вәкилдәренең Ҡырмыҫҡалы районының социаль-иҡтисади тормошона йоғонтоһо»тигән темаға сығыш яһаны.

Райондарҙан килгән ҡор баштары ла артабан бергәләшеп эшләү маҡсатында үҙҙәренең теләктәрен һәм ихтирамын ойоштороусыларға еткерҙе.