Һәр кем үҙ һорауына яуап тапты

 Һәр кем үҙ һорауына яуап тапты

“Айыҡ ауыл” конкурсының республика этабында ҡатнашыусы Үтәгән ауылында сираттағы сара – Ғаилә консультацияһының берҙәм көнө уҙҙы.

Иртәнге сәғәт ундан алып киске сәғәт бишкә тиклем бында район белгестәре ауыл халҡына консуль­тация бирҙе. Һәр кем уларға үҙҙәрен ҡыҙыҡһындырған һорауҙар менән мөрәжәғәт итә алды.

Белгестәр командаһы «Ғаилә» хеҙмәте, Мәшғүллек үҙәге, Күп функ­циялы үҙәк, мәғариф бүлеге бел­гестәренән һәм шулай уҡ табип-нарко­лог менән психологтан тора ине.

- Дәүләт хеҙмәте порталы, Пушкин картаһы һәм социаль ярҙам буйынса һорауҙар менән күп кеше мөрәжәғәт итте, - тип ҡаршы алды Күп функци­ялы үҙәктең әйҙәүсе белгесе Екатерина Крикунова.

Мәғариф бүлеге методисы Нәркәс Ҡоҙаҡаева ла Пушкин картаһы буйын­са мәғлүмәт туплай.

Мәшғүллек үҙәге начальнигы Ша­мил Хафизов менән әйҙәүсе инспек­тор Маргарита Кәримова эргәһенән дә кеше өҙөлмәй. Уларға күбеһенсә адреслы социаль ярҙам тураһында бе­лешмә алырға киләләр.

- 30 ғинуарҙа беҙ был ауылда осрашыу үткәргәйнек. Ул көндө 15-лә­гән кеше социаль үҙәккә иҫәпкә тороу, ниндәй һөнәрҙәр буйынса белем алыу, үҙ эшеңде асыу һәм эш эҙләү һорауҙары менән мөрәжәғәт итте. Бөгөн дә ошон­дайыраҡ һорауҙар менән килеүселәр байтаҡ булды, - тине улар.

- “Ғаилә үҙәгенән берәй ярҙам бу­лырмы?”- тигән һорау менән никах­та торған һәм тиҙҙән балалары була­саҡ ғаилә килде. Әлбиттә, ниндәйҙер проблемалары булған һәр ғаиләгә ярҙам итергә әҙербеҙ. Беҙҙә күптән эшләп килгән “Социаль оҙатыу” тигән хеҙмәт буйынса юрист-консульт, пси­холог, ғаилә менән эшләү белгесе бын­дай ғаиләләргә ярҙам ҡулы һуҙа. Беҙ­гә мөрәжәғәт иткән ғаиләнең йәшәү шарттары менән танышҡас, төрлө кәңәштәребеҙҙе бирәбеҙ. Шулай уҡ уларға әйберләтә ярҙам күрһәтеү мөм­кинлегенә эйәбеҙ. Адреслы ярҙам ту­раһында белешеүселәр ҙә булды, - тип белдерҙе “Ғаилә” хеҙмәте белгесе Ай­ҙар Ниғмәтуллин.

Консультация алырға килгән Гөлна­зирә Хәмитова менән әңгәмәләштек. Ул:

- Мөкәй ауылынан ағайымды үҙе­беҙгә алып ҡайттыҡ. Ул ныҡ сирләй, һыҙлана. Реабилитацияға алып ба­рырға ине. Бөгөн шул һорау менән мөрәжәғәт иттем. Ыңғай хәл ителер, тип ышанам, - тине.

Был көндө шулай уҡ район үҙәк дауаханаһының психиатр-нарко­логы Илһөйәр Ғизәтуллина менән “Йәшлек” үҙәге психологы Эльмира Гәрәева уҡыусыларға, имтихандарҙан һуң стресс кисермәҫ өсөн нимәләр эшләргә, йәмғиәттә үҙеңде тотоу, ке­шеләр менән уртаҡ тел табыу, сәләмәт тормош һәм насар ғәҙәттәре булған кешеләргә эйәрмәҫкә кәрәклеге ту­раһында әңгәмә алып барҙылар.

Шулай уҡ был көндө Үтәгән ауылы халҡын ҡыҙыҡһындырған һорауҙар менән район хакимиәтенең бәлиғ бул­мағандар эштәре буйынса комисси­яһының баш белгесе Анжела Гукасян, опека һәм попечителлек үҙәгенең баш белгесе Джульетта Кашхчян һәм Яңы Ҡыйышҡы ауыл Советы хакимиәте башлығы Фәнзиә Өмәтҡолова ҡабул итте.

Розалия НАЗАРОВА.

Автор фотоһы.