Яҡты хәтирәләр уята

Яҡты хәтирәләр уята

Һуңғы йылдарҙа ҙур теләк менән тыуған Башҡортостаным буйлап сәйәхәт ҡылам һәм бер ҡайҙа ла бынан да матурыраҡ урындар, бынан да байыраҡ тәбиғәт булмауына ҡабаттан инанам...

Күптән түгел генә Ҡарлыман карст йылғаһы бассейнында урынлашҡан Ҡарлыман мәмерйәһендә булырға тура килде. Был мәмерйә бейек гипслы ҡая (урындағы халыҡ уны Олотау тип йөрөтә) нигеҙендә барлыҡҡа килгән. Ҡарлы­ман ауылы һоҡланғыс тәбиғәт ҡосағында урын­лашҡан. Бында бик уңған һәм талантлы халыҡ йәшәй.

Тормош иптәшем менән бергә Ҡарлыман ауылында тәүге тапҡыр 25 йыл элек Абакачевтар һәм Ҡотлобаевтарҙың матур ғаиләһендә булғай­ныҡ. Йылы осрашыуҙарға бай ваҡыттар, йыр- моңдар менән һуғарылған кистәр, бик күңелле аралашыу беҙҙең ғаиләнең хәтерендә мәңгелеккә уйылып ҡалды.

Икенсе тапҡыр иһә билдәле шағир-фронто­вик, Башҡортостандың халыҡ шағиры, халыҡ йыры булып киткән “Әлдә һин бар әле донъяла” йырының авторы Шәриф Бикҡолдоң был ауыл­дағы йорт-музейына килергә насип булды. Бын­да беҙ Шәриф Бикҡолдоң тормош иптәше Рәйсә Мирҡасим ҡыҙы, “Кызыл таң” гәзите журнали­сы, шағирә Фәниә Ғәбиҙуллина, билдәле йырсы Радик Динәхмәтов һәм ҡыҙым Алина Абдулли­на менән килгәйнек. Ул саҡта шағирҙың музейы яңы ғына эшләй башлағайны. Беҙ дискылар, ки­таптар һәм афишалар бүләк иттек. Был музейҙа композитор Байрас Абдуллиндың ижадына ар­налған мөйөш булдырылғаны өсөн оло рәхмәтле­мен һәм сикһеҙ ғорурлыҡ кисерәм. Ул саҡта беҙ уҡытыусылар һәм уҡыусылар менән осраштыҡ, ауыл клубында йәмле концерт ҡараныҡ. “Кызыл таң” һәм Татарстандың “Мәдәни жомга” гәзит­тәрендә был осрашыу хаҡында Фәниә Ғәбиҙул­линаның “Ике Рәйсәгә бер йыр” тигән мәҡәләһе баҫылып сыҡҡайны.

Йорт-музейҙағы һәр әйберҙе шағирҙың яҡташтары бөртөкләп йыйғандар һәм матур итеп һаҡлайҙар. Музей етәксеһе Фәйрүзә Ҡотлобаева­ның ҙур көсө менән музей заманса форма алды, бай эстәлекле мәҙәниәт учреждениеһына әүерел­де. Бында даими рәүештә уҡыусылар өсөн сара­лар уҙғарыла, төрлө тарафтарҙан бихисап яҙыу­сылар һәм шағирҙар килә.

2019 йылдың 23 майында Ҡарлыманда Шәриф Бикҡолдоң тыуыуына 95 йыл тулыуға арналған хәтер кисәһе уҙҙы. Танылған яҡташтарыбыҙ – Тимерғәле Килмөхәмәтов, Барый Ноғоманов, Фәнзил Санъяров, Рәмил Сурағол һәм шулай уҡ йырсы Радик Динәхмәтов, журналист Фәниә Ғә­биҙуллиналар килгәйне. Беҙ ауыл халҡы менән осраштыҡ, шағирҙың ҡәберенә сәскәләр һалдыҡ. Ошо уҡ кисте ауыл клубында ҡунаҡтар өсөн бик матур кисә ойошторолдо.

Йәмле Ҡарлыман ауылы күңелемдә ошондай яҡты хәтирәләр уята.

Рәйсә АБДУЛЛИНА

Өфө ҡалаһы.