Аграрийҙарҙың хеҙмәте юғары баһаланды

Аграрийҙарҙың хеҙмәте юғары баһаланды

Район Мәҙәниәт һарайында ауыл хужалығы һәм эшкәртеү сәнәғәте алдынғыларын тәбрикләү сараһы уҙҙы. Байрамда мәртәбәле ҡунаҡтар ҙа ҡатнашты.

Тантаналы сара Гөлшат Ильясова етәк­селегендәге район Мәҙәниәт һарайының “Дәрт” вокаль ансамбле башҡарыуындағы “Игенселәр” йыры менән башланып китте.

Муниципаль район хакимиәте башлығы Әлфир Сабиров аграрийҙарҙы сәләмләп:

-Ғорурланырлыҡ һәм өлгө булырлыҡ ауылдың ысын хеҙмәтсәндәрен сәләмләй­ем. Һеҙҙең һөнәри эшмәкәрлек – республи­кабыҙҙың аҙыҡ-түлек именлегенең нигеҙе. Ауыл хужалығы – ул йәшәү өсөн мөһим тар­маҡ. Ағымдағы йыл аграрийҙар өсөн ауыр һәм ҡатмарлы булды тип әйтеү ҙә, хатта, аҙ кеүек. Һуңғы бер нисә йыл эсендә беҙ ҡоро­лоҡ менән көрәштек, уңыш үҫтереү өсөн яңы ысулдар эҙләнек, әммә быйылғы йыл беҙгә ҡойма ямғырлы сюрприз яһаны һәм эшләр­гә ҡамасауланы. Шуның һөҙөмтәһендә ун мең гектарҙан ашыу ауыл хужалығы культу­раларын юғалттыҡ. Шуға ҡарамаҫтан, район буйынса уртаса уңыш гектарынан 36 центр тәшкил иткән 119 меңдән ашыу тонна бойҙай йыйып ала алдыҡ.Ауыл хужалығы хеҙмәткәрҙәренең барыһына ла ошон­дай ҙур хеҙмәте өсөн рәхмәт белдерәм, -тине һәм иң ал­дынғы аграрийҙарҙы бүләклә­не. “Уңыш” (етәксеһе Илгиз Ханнанов) һәм “Артемида” (етәксеһе Евгений Пожида­ев) хужалыҡтары 2024 йылдың район ярышы һөҙөмтәләре буйынса иң юғары күрһәт­кестәргә өлгәшкәне өсөн дипломға эйә булды. “Иң яҡшы крәҫтиән-фермер хужалығы” номинацияһында Рәиф Хә­литовтың КФХ-һы еңеүсе тип табылды. Шулай уҡ йәмле тан­танала бихисап яҡташтарыбыҙ район хакимиәте башлығы ҡу­лынан Маҡтау ҡағыҙҙары һәм Рәхмәт хаттары алыу ҡыуанысын кисерҙе.

Байрам ҡунағы – БР ауыл хужалығы министры урынбаҫары Ирек Сураҡов районы­быҙҙың ауыл хужалығы вете­рандарын һәм алдынғыларын БР хөкүмәте премьер-министры урынбаҫары — Башҡор­тостандың ауыл хужалығы министры Илшат Фәзрахма­нов исеменән тәбрикләп, изге һүҙҙәрен еткерҙе.

- Ҡырмыҫҡалы районында ауыл хужалығы һәм эшкәртеү сәнәғәтенең барлыҡ төрҙәре лә бар. Бында эшһөйәр халыҡ йәшәй. Йыл ауыр булды, әммә аграрийҙар һөҙөмтәле эшлә­не. Ҡырмыҫҡалы районы һәр саҡ алдынғылар рәтендә бара, - тип, районыбыҙ аграрийҙа­рына оло рәхмәтен белдер­гәс, юғары һөнәри оҫталығы, эшендәге ҡаҙаныштары өсөн “Кировец-Өфө” йәмғиәте директоры Радик Хафизовҡа Башҡортостан Республикаһы­ның Маҡтау ҡағыҙын тапшырҙы. Шулай уҡ ул бер төркөм ауыл хужалығы эшсәндәрен БР Ауыл хужалығы министр­лығының Маҡтау ҡағыҙҙары һәм Рәхмәт хаттары менән бүләкләне.

Әлфир Фәрхәт улы менән Ирек Искәндәр улы үҙҙәре­нең сығыштарында ауыл хужа­лығы өлкәһе хеҙмәтсәндәре­нең махсус хәрби операция яугирҙәренә күрһәткән оло ярҙамдарын билдәләп китергә лә онотманы.

Районыбыҙ таланттары –Филүс Шәңгәрәевтың сак­сафондағы моңло көйҙәре, Марсель Алдаҡаев һәм Дарья Якунина етәкселегендәге “Прибельские зори” ансамбленең йырҙары сараға байрам кәйефе өҫтәне.

Алдағы йылдар барыбыҙҙы ла мул уңышы менән ҡыуан­дырһын, өҫтәлдәребеҙ ҡабарып бешкән икмәктән өҙөлмәһен тигән теләктәр менән тамам­ланды байрам сараһы.

Һөнәре буйынса иң яҡшылар:
“Иң яҡшы комбайнсы” – Илгиз МОЗАФАРОВ, “Уңыш” ху-
жалығы механизаторы;
“Иң яҡшы механизатор” – Николай ЛАВРЕНТЬЕВ,
“Уңыш” хужалығы механизаторы;
“Иң яҡшы водитель” – Виктор КУЗЬМИН, “Артемида” ху-
жалығы водителе;
“БР “Үҙәк” МТС-ының Ҡырмыҫҡалы филиалының иң яҡшы
хеҙмәткәре” – Ғәлинур КӘРИМОВ, “БР “Үҙәк” МТС-ының
“Нива” Ҡырмыҫҡалы филиалы водителе;
“Иң яҡшы энергетик” – Илнур БУЛАТОВ, “Кармаскалинск-
сельхозэнерго” йәмғиәтенең электр монтажсыһы;
“Иң яҡшы кондитер” – Зәлифә ҒҮМӘРОВА, “Ҡырмыҫҡалы
икмәк комбинаты”ның кондитеры;
“Иң яҡшы икмәк бешереүсе” – Юлия ЗАЙЦЕВА, “Ҡыр-
мыҫҡалы икмәк комбинаты”ның икмәк бешереүсеһе;
“Иң яҡшы машина менән һауыу операторы” – Елена НО-
ВОЖИЛОВА, “Артемида” хужалығының машина менән һауыу
операторы.

Розалия НАЗАРОВА.

Автор фотолары.