Яңы белем һәм тәжрибә менән байытты

Яңы белем һәм тәжрибә менән байытты

Ҡабаҡ ауылындағы “Кировец-Өфө” етештереү-техник үҙәгендә Башҡортостан Республикаһы Дәүләт Йыйылышы – Ҡоролтайҙың аграр мәсьәләләр һәм тәбиғәттән файҙаланыу буйынса Комитетының күсмә ултырышы үтте.

Комитет рәйесе Илшат Вәзиғәтов етәкселегендә уҙған сарала республиканың ауыл хужалығы производ­ствоһын техник һәм технологик яҡтан яңыртыу, ауыл хужалығы һәм эко­логия үҫешенең мөһим аспекттары мәсьәләләре ҡаралды.

Иң тәүгеләрҙән булып сығыш яһаусы Башҡортостан Республикаһы­ның Премьер-министры урынбаҫары – ауыл хужалығы министры Илшат Фәзрахманов үҙенең докладында ауыл хужалығының техник һәм технологик модернизацияһы, инновацион үҫеше проблемалары хаҡында бәйән итте. Башҡортостан Республикаһының ауыл хужалығы предприятиелары һәм фермерҙары 2024 йылдың 4 айы эсен­дә 2,8 млрд һумға 633 берәмек ауыл хужалығы техникаһы һатып алыуын һыҙыҡ өҫтөнә алды һәм:

- Ғинуарҙан апрелгә тиклем 107 трактор, 34 комбайн, 200-ҙән ашыу ер эшкәртеү һәм башҡа техника алынды. 2024 йылда яҙғы сәсеүҙе 12430 трактор башҡарҙы. Был 2023 йылдың күрһәт­кестәренән 180 берәмеккә күберәк. Быйылғы яҙғы сәсеүлектәрҙең дөйөм майҙаны 2,1 млн гектар тәшкил итә. 14 майға ҡарата уларҙың 924 000 гектары (46%) сәселеп бөттө, - тине ул.

Ултырышта видеобәйләнеш аша сығыш яһаусылар ҙа булды. “Пе­тербург трактор заводы” акционер йәмғиәтенең директор урынбаҫары Борис Филин санкциялар шартта­рындағы ыңғай тәжрибәһе менән ур­таҡлашты. 500-ләгән предприятиеның һәм 90 мең тирәһе кешенең “Кировец” тракторҙарына төрлө кәрәкле детал­дәр етештереүе, “Кировец-Өфө”нөң был етештереүселәр һәм хеҙмәтлән­дереү предприятиелары сылбырында лайыҡлы урын биләүе хаҡында бил­дәләп үтте ул.

“Кировец-Өфө” етештереү-техник үҙәге эшмәкәрлеге менән йәмғиәттең генераль директоры Радик Хафизов таныштырҙы.

Артабан Комитет рәйесе Илшат Вәзиғәтов “Тоҡомло малсылыҡ ту­раһында”, Комитет рәйесе урын­баҫары Раил Әбдрәхимов “Һунар һәм Башҡортостан Республикаһында һу­нар ресурстары”, “Урман мөнәсәбәт­тәрен көйләү тураһында” проектта­рын тикшерҙе.

Башҡортостан Республикаһы Прокуратураһының федераль ҡану­ниәттең үтәлешен күҙәтеү буйынса идаралыҡ начальнигы урынбаҫары Дамир Мөхәмәтшиндың сығышы “Башҡортостан Республикаһында ер мөнәсәбәттәрен көйләү тураһын­да” булһа, Башҡортостан Республи­каһының ер һәм мөлкәт мөнәсәбәт­тәре министры Наталья Полянская “Башҡортостан Республикаһында ер мөнәсәбәттәрен көйләү тураһында” һүҙ тотто.

Башҡортостандың ветеринария буйынса дәүләт комитеты рәйесе Азат Йыһаншиндың доклады “Башҡор­тостан Республикаһында хайуандар менән яуаплы мөғәмәлә итеү тураһын­да” барҙы. Бында һәр беребеҙҙе борсо­уға һалған берәҙәк эттәр һәм бесәйҙәр проблемаһы ла күтәрелде һәм уны ни­сек хәл итеү юлдары билдәләнде.

Ғөмүмән, күсмә ултырышта ауыл хужалығына ҡағылышлы барлыҡ мәсьәләләр буйынса эшлекле һөйлә­шеү уҙҙы, айырым норматив-хоҡуҡи акттарға үҙгәрештәр индереү һорауҙа­ры ҡаралды.

- Сара бай һәм продуктив булды. Ул беҙҙе яңы белем һәм тәжрибә менән байытты. Әлбиттә, техниканың ауыл хужалығында ниндәй ҙур роль уй­нағанын барыбыҙ ҙа яҡшы аңлайбыҙ, бигерәк тә, ауылда эшсе көстәр етеш­мәгән саҡта, - тигән фекерҙәрен бел­дерҙеләр ултырышта ҡатнашыусылар һәм “Кировец-Өфө” йәмғиәте эше менән яҡындан танышыу маҡсатында предприятие буйлап сәйәхәт ҡылды.