Даирә
+16 °С
Болотло
Бөтә яңылыҡтар

Киләсәк уңышҡа нигеҙ һалына

Ҡар иреп бөтөү менән ер өлгөргән хужалыҡтарҙа яҙғы баҫыу эштәре башланды.  

Киләсәк уңышҡа нигеҙ һалына
Киләсәк уңышҡа нигеҙ һалына

Киләсәк уңышҡа нигеҙ һалына

Ҡар иреп бөтөү менән ер өлгөргән хужалыҡтарҙа яҙғы баҫыу эштәре башланды.

Районда әлеге ваҡытта “Уңыш”, “Артемида” йәмғиәттәре, “Мифтахов”, “Хәлитов” крәҫтиән-фермер хужа­лыҡтары баҫыуҙарында дым ҡаплатыу, минераль ашламалар индереү эштәре бара. Тәүгеләр рәтендә ер эштәренә то­тонған “Мифтахов” крәҫтиән-фермер хужалығындағы эштәр барышын күреү өсөн юл тоттоҡ.

Баҫыу Яңы Бишауылға яҡын булып сыҡты. Йәмле тәбиғәт ҡосағы эргәһен­дәге сәсеү ере тракторҙарҙың гөрөлдәү тауышына күмелгәйне. Уларға күктәге һәм ағастарҙағы ҡоштар моңо ла ҡушы­ла. Был күңелгә әйтеп аңлата алмаҫлыҡ тыныслыҡ һәм шатлыҡ хистәре өҫтәй.

- Барлығы 694 гектар һөрөнтө ерем бар. Өлгөргән ерҙәрҙә эштәрҙе тиҙ ара­ла башҡарырға кәрәк. Эшсе ҡулдар етә. Механизаторҙарҙың һәр береһе үҙ эштәрен белеп, тырышып, алдарына ҡуйылған бурыстарын еренә еткереп үтәй. Мәҫәлән, Мансур Ғәлиев агре­гат ярҙамында минераль ашламаларҙы һиптергәс, Илшат Йосоповтың агре­гаты уның артынан тырмата. Руслан Мифтахов көнбағыш сәселгән ерҙәрҙе дисковать итһә, Илшат Ғөбәйҙуллин дым ҡаплата. Тупраҡта дымды һаҡлап ҡалырға кәрәк, шуға ла ошо мөһим мәлде ҡулдан ысҡындырмаҫҡа тыры­шабыҙ, - ти хужалыҡ етәксеһе Ришат Мифтахов.

Әйткәндәй, Ришат Рафаил улы үҙе лә баҫыуҙа ине. Ул үҙенең Т-150 трак­торында сик араларын һөрөп, эштәр барышын ҡарап йөрөй. Ҡатыны Айгөл Миңлейәр ҡыҙы “Нива” машинаһы­ның руле артында эшселәргә йылы аш килтерҙе.

Фермерҙың һүҙҙәре буйынса, тех­ника төҙөк, яғыулыҡ-майлау матери­алдары бар һәм орлоҡ әҙер. Был тәүге эштәр тамамланғас, сәсеүгә төшәсәк­тәр.

Механизаторҙарҙың эштәренә ҡа­рап һоҡланып торҙом. Уларҙың күңеле эш дәрте менән тулыуы һиҙелә. Тыр­маланған ерҙәр тип-тигеҙ булып ҡала, кәҫтең әҫәре лә юҡ. Һауа торошо ла бу­лышлыҡ итә, ҡояш көлә.

“Атайҙан күргән – уҡ юнған” ти­гән мәҡәл бар. Ришат Мифтахов та эшһөйәр, тырыш нәҫелде дауам итеүсе булып тора. Атаһы Рафаил ағай ғүмере буйы колхозда агроном, артабан фер­мер булып оҙаҡ йылдар эшләне. Хәҙер инде уның ер эшен кесе йәштән күреп, бергә ярҙамлашҡан тырыш улдарының дауам итеүе ҡыуаныслы. Мифтаховтар үҙҙәрен генә түгел, башҡаларҙы ла эш менән тәьмин итеп, уңышҡа өл­гәшә. Ришат Мифтахов етәкселеген­дәге крәҫтиән-фермер хужалығы бөтә эштәрҙе лә яйға һалып, етди аҙымдар менән алға бара. Әле игенселәр яҙғы көндөң йылды туйҙырыуын аңлап, бар көстәренә, еңде һыҙғанып тырыша.

Эште дөрөҫ һәм ваҡытында башҡа­рыу киләсәк уңыштың нигеҙе булып тора. Фермер хужалығының яҙғы баҫыу эштәрен ваҡытында башҡарып сығыуына ышаныс ҙур.

Фәниә СӘЛИМГӘРӘЕВА.

Автор фотолары.

Автор:
Читайте нас: