“Йәшел ураҡ” киң ҡолас менән бара

Әлеге көндәрҙә үләндең иң өлгөр­гән сағында хужалыҡтарҙа эш ҡайнай. Ауыл эшсәндәре уны ваҡытында әҙер­ләү мөһим икәнен һәм йәй айының бер көнө йылды туйҙырғанын яҡшы аңлап, етерлек аҙыҡ запасын тупларға тыры­ша. Был юҫыҡта “Уңыш” һәм “Артеми­да” йәмғиәттәре “йәшел ураҡ”ты тәү­геләрҙән булып башланылар. “Уңыш” хужалығында бесәнгә төшһәләр, “Ар­темида”ла сенаж әҙерләү эштәре менән мәшғүлдәр.

Беҙ “Уңыш” йәмғиәтенә ҡараған Иҫке Муса бүлексәһенең Варшавка ауылы эргәһендәге баҫыуына барғас, уның бер осонан икенсеһенә ҡеүәтле техникалар йөрөгәне күренде.

- Был 60 гектар козлятник үлә­не сәселгән баҫыуҙа өс механизатор бесән әҙерләү менән мәшғүл. Артур Хәмиҙуллин агрегаты менән сабылған үләнде әйләндерһә, Йәмил Сәйетҡо­лов һәм Василий Петров преслау эштәрен башҡара. Тейәгестә Илшат Иштуғанов эшләй. Вениамин Иванов үләнде сапҡан. Көнөнә 180 тирәһе ру­лон сыға. Техника тик тормаһын өсөн башҡа бүлексәләрҙә лә алмашлап эшләнелә. Мәҫәлән, тәүҙә эш Ҡыр­мыҫҡалы бүлексәһендә башланһа, ар­табан башҡа баҫыуҙарға күсә. Ваҡытты бушҡа әрәм итмәҫ, техникалар тик тор­маһын өсөн шулай эшләнелә. Шулай уҡ 72 гектар тирәһе ерҙәге костер үлә­нен Олег Сольев үҙенең шәхси сапҡыс агрегатында саба. Егеттәрҙең барыһы ла намыҫ менән эштәрен башҡара­лар. Улар мал продукцияһын әҙерләү өсөн алһыҙ-ялһыҙ тырыша. Йәй ғүмере ҡыҫҡа, һауа торошо булышлыҡ иткән­дә бесәнде һутлы сағында дөйөм ты­рышлыҡ менән эште атҡарып сығырбыҙ, - ти бүлексә бригадиры Миҙхәт Насиров.

Әйткәндәй, Йәмил Сәйетҡолов, Илшат Иштуғанов һәм Василий Петров оҙаҡ йылдар ауыл хужалығында хеҙмәт итәләр, ә Артур Хәмиҙуллин - Өфө тимер юлы колледжы студенты. Артур 4-се курс алдынан бында йәйге осорҙа эшкә килгән. Бөтөнләй башҡа өлкә­не һайлаған тырыш егет эшенән бик ҡәнәғәт. Көндө төнгә ялғап хеҙмәт ит­кән механизаторҙарҙың тырышлығын баһалап бөткөһөҙ. Эйе, бында эшләйем тигән кешегә хеҙмәт итеү өсөн бар­лыҡ шарттар ҙа тыуҙырылған: техника ла шәп, эш хаҡы ла ваҡытында түләнә. Ауыл хужалығы хеҙмәтсәндәренең ур­таҡ тырышлығы һөҙөмтәһендә маҡсат­ты атҡарып сығырҙарына шик юҡ.

Фәниә СӘЛИМГӘРӘЕВА.

Автор фотолары.