- Бесән әҙерләнеп бөткәндән һуң, баҫыу эштәренә тотондоҡ. Игендең мал аҙығы һәм киләһе йыл сәсер өсөн булған өлөшө елгәртелеп, таҙартылып, һаҡлауға һалына. Был яуаплы һәм ауыр эштә Данир Ишемғолов иген таҙартыу ҡоролмаһында булһа, Миңнур Ҡаһирова, Лилиә Намаҙғолова, Зәлиә Әлмөхәмәтова ҡул көсө - көрәктәр тотоп эшләйҙәр. Илнур Әлмөхәмәтов тракторҙа таҙартылған әҙер игенде келәт эсенә ташып тора. Ҡалған өлөш элеваторға оҙатылып, артабан һатыу өсөн ебәрелә. Хеҙмәтсәндәрҙең һәр береһе үҙ эштәрен белеп башҡара. Беҙҙең бригадала барлығы 1435 гектар ер бар, уның 30 гектарында һоло, 112 гектарында ярауай бойҙай, 234 гектарында арыш, 146 гектарында арпа, шулай уҡ ҡалған ерҙәр - мал аҙығы өсөн бесәнлек һәм парна ерҙәре. Бөртөклө культураларҙың уңышы гектарына 30 центнер тәшкил итә, - ти, - ти бригадир вазифаһын башҡарыусы Илнур Ишемғолов.
Ә хужалыҡтың управляющийы Рәмил Рәшит улы Әминевтың һүҙҙәре буйынса Илнур Мөхәмәт улы бар эштәрҙе контролдә тота, ул үҙе бер үк ваҡытта келәт һәм ферма мөдире эштәрен дә башҡара.
Ауыл эшсәндәренең һәр береһе һәр сәғәттең ҡәҙерен белеп, үҫтерелгән уңышты юғалтыуҙарһыҙ йыйып алыу өсөн бар көстәрөн һалып тырыша.
Фәниә Сәлимгәрәева.
Автор фотоһы.