Уны, моғайын, белмәгән кеше һирәктер. Ул – дин әһеле, эшҡыуар, риэлтор, спортсы (шахматсы, тенниссы), баянсы, йырсы, тамада, психология фәне менән ҡыҙыҡһына, китаптар уҡырға ярата... Бер кеше нисек шул тиклем эштәрҙе башҡарып өлгөрә икән, тип аптыраныҡ. Баҡтиһәң, алдан планлаштырыу буйынса йәшәһәң, бар нимәгә лә өлгөрөп була икән!
Эйе, Әлфәрит Ширғазин – районыбыҙҙың күптәргә өлгө булған булдыҡлы ир-егеттәренең береһе. Егет кешегә етмеш төрлө һөнәр ҙә аҙ, тигән мәҡәл тап уның хаҡында тиерһең.
Әлфәрит Минихәй улын тиҙ генә осратып булманы. Уның һәр сәғәте алдан планлаштырылған булып сыҡты. Ваҡыт бүлеп, әңгәмәгә риза булды. Осрашыуҙың теүәл сәғәтенә килергә тура килде. Ул тыумышы менән Миәкә районынан. Ғаилә Стәрлетамаҡ ҡалаһына күсенеү сәбәпле, малай башланғыс кластарҙан уҡ Стәрлетамаҡта уҡый. 1-се кластан мәктәп сараларында сығыш яһай. Музыка мәктәбендә лә шөғөлләнә, хорҙа йырлай, унда солист була. Артабан талантлы малайҙы Өфөнөң һәләтле балалар уҡыған музыка лицейына ебәрәләр. Бында төплө музыка белгеслеге ала, 10 йәштән баянда уйнарға, Иоганн Себастьян Бах, Людвиг ван Бетховен, башҡорт композиторҙары ижад иткән әҫәрҙәрҙе өйрәнә. 11-се класты тамамлағандан һуң, З.Исмәғилев исемендәге сәнғәт академияһына уҡырға инә. Уҡыу йортонда фортепьяно, солфеджио, дирижерлыҡ, гармония һәм башҡа дәрестәрҙә шөғөлләнә. Әммә был юғары уҡыу йортонда уҡыуҙы ваҡытлыса туҡтатып торорға тура килә (шулай ҙа, һәр нимәне аҙағына еткерергә кәрәк тип тапҡан егет уны бер нисә йылдан һуң ситтән тороп тамамлай). Бәлки Хоҙай ҡушыуылыр, юлында ул дин әһелен осрата һәм мәҙрәсәгә уҡырға бара.
- Уҡып бөтөп килгәндә Замир хәҙрәт Олокүлдең иман йортонда Ураҙа ғәйетен уҙғарырға кәрәк тигәс, килеп үткәрҙем. Аҙаҡ Ҡорбан байрамына саҡырҙылар. Халыҡ оҡшатты, ҡал, тиҙәр. Шулай итеп, бында эшләргә килдем. Был саҡта миңә ни бары 22 йәш ине. Инде күпме йылдар үткән, хәҙер Олокүл, ғөмүмән, дөйөм район миңә шул тиклем яҡын, - тип һөйләне ул.
Был йылдарҙа мәсеткә ҙур өлөш индереп, халыҡ менән бергәләп күпме дини байрамдар, йома намаҙҙары үткәргән, теләгәндәргә ғәрәп телен өйрәнергә ярҙам иткән, хатта 1995-1996 уҡыу йылында урындағы мәктәптә 6-сы класс уҡыусыларына ғәрәп теле дәрестәрен уҡыта. Киләһе йылдан алып, өс йыл ошонда уҡ музыка дәрестәрен алып бара.
Бер урында ғына тора торған кеше түгел ул Әлфәрит хәҙрәт. Һәр саҡ заман менән бергә атлай, камиллыҡҡа ынтыла. Эшҡыуарлыҡ менән шөғөлләнеү өсөн тәҡдим булғас, баш тартмай. Бер саҡ бажаһы бер нисә районды үҙ эсенә алып, “Бельский курьер” реклама гәзитен аса, бергәләшеп эшләйҙәр. Бажаһының теләге бөтә республика буйынса хеҙмәттәшлек итеү була. Шул тиклемгә өлгөрөргә лә кәрәк бит, тип, баш тарта һәм артабан айырылып, Ҡырмыҫҡалы һәм күрше райондарҙы үҙ эсенә алып, хәҙер инде күптәр белгән һәм иғлан биргән “Города и районы” реклама гәзитен асып ебәрә. Уның халыҡҡа бушлай тарата торған гәзитен халыҡ белә, ярата, иғландар бирә, даими клиенттары бар. Әйтеүе генә анһат, ни тиклем тырышлыҡ, иғтибарлыҡ талап ителә. Үҙе ойоштороусы, үҙе иғлан алыусы, үҙе йыйыусы, үҙе водитель - гәзитте Өфөләге типографиянан барып ала һәм бер нисә райондарҙың магазиндары буйлап тарата.
Үҙендә сикһеҙ ышаныс булған, эшҡыуарлыҡта тәжрибә туплаған тынғыһыҙ, дәрт-дарманлы ир бик яуаплы, быға тиклем белмәгән риэлторлыҡ хеҙмәте менән дә шөғөлләнергә ең һыҙғанып тотона. Ул таныш-белештәргә фатирҙар, йорттар һатыу-алыуҙа ярҙам итә. Кешеләр мутлашыусылар, намыҫһыҙҙарҙан алданып ҡуймаһын өсөн бар көсөн һалып тырыша. Изге эш аша кешеләргә файҙа килһен, тигән уйҙа ул.
Талантлы, йыр-моң яратҡан Әлфәрит Ширғазин күңел талабы буйынса сәхнәне лә ташламай. Мәҙәниәт йортонда баянда уйнап, йырлаған моңло тауышлы ирҙең сығышы тамашасының күңеленә хуш килә. Музыкаға һәләте арҡаһында тамада хеҙмәтенән дә баш тартмай ул. Әйткәндәй, әлеге көндә уның үҙе көй һалған 50 йыры ла бар.
Һәр нимәгә өлгөр Әлфәрит Минихәй улы ваҡыт табып, районда уҙғарылған шахмат һәм спорт ярыштарында ла ҡатнашыуҙан ситтә ҡалмаҫҡа тырыша. Ул һәр саҡ призлы урындар алыуҙы маҡсат итеп ҡуя һәм теләгенә ирешә лә.
Ширғазин тыумышы менән танылған изге Нарыҫтау яғынан. Күреп-ишетеп тора, бында шифалы һыу артынан халыҡ ағымы туҡтамай. Кемдәр барырға теләп тә транспорт мәсьәләһе буйынса бара алмай икән, уларҙы шунда алып барырға кәрәк тигән идея килә уның башына. Сөнки кешене ышаныс та йәшәтә бит. Ул иғлан биреп, изге хыялын тормошҡа ашыра: сырхауҙарға һауығырға ярҙам булһын өсөн ихлас күңеленән ваҡытын бүлә. Уның һүҙҙәре буйынса, кешеләр рәхмәтен алып йәшәргә кәрәк.
Ҡатыны Рәмзиә Зәйнулла ҡыҙы менән ике улға ғүмер бүләк иткәндәр. Өлкәне Мөслим Өфө дәүләт нефть- техник университетын, кесеһе Динислам Өфө дәүләт авиация-техник университетын тамамлаған. Улар барыһы ла ғаилә башлығының һәр эшен, башланғысын хуплап торалар.
Әлфәрит Минихәй улы юлында осраған ауырлыҡтарҙы еңеп, тырышлығы, ваҡыттың ҡәҙерен белеүе арҡаһында матур уңыштарға өлгәшә. “Ғүмерҙе бушҡа сарыф итмәйенсә, бөтә хыялдарҙы тормошҡа ашырырға була, тик теләк кенә булһын”, - ти ул. Һәләтле лә, маҡсатлы ла, иреклеккә, аҡса табыуға ынтылған ир һәр башланғысын бисмилланан башлап, алға ынтыла. Ерҙә ныҡлы баҫып торған Әлфәрит Ширғазин ғаиләһен матди яҡтан тәьмин итеү генә түгел, иғәнә ярҙамында, хәйриә акцияларында ла ҡатнаша.
Эйе, ҡыйыуҙар, баҙнатлылар, тәүәккәлдәр һәм ҡыйыуҙар ғына эшҡыуар була шул. Эште тырышып эшләй белһәң, һәр береһе уңыш килтерә, һөҙөмтә буласаҡ.
Күп яҡлы талант эйәһе, һәләтле Әлфәрит Ширғазинға бәхетле оҙон ғүмер һәм яңынан-яңы уңыштар теләйбеҙ.
Фәниә Сәлимгәрәева.
Эльнара Шаймарҙанова фотоһы.
Реклама хоҡуғында.