Даирә
+13 °С
Болотло
Бөтә яңылыҡтар
Афарин!
16 Февраль 2021, 13:15

Матурлыҡ та көн дә кәрәк...

Фәүриә ӘБҮТАЛИПОВА, Иҫке Бәпес ауылы:Матурлыҡ тураһында һүҙ йөрөткәндә һәр ваҡыт тәү сиратта кешенең эске күңеле матур булырға тейеш, тибеҙ. Ысынлап та, был һүҙҙәр менән килешмәй булмай. Күңелендә тирә-йүнгә, кешеләргә ҡарата һөйөү, ихтирам йөрөткән кеше йәмһеҙ була алмай.

Тик шулай ҙа, эске матурлыҡ мөһим булһа ла, беҙ, ҡатын-ҡыҙҙар һәр ваҡыт тышҡы ҡиәфәтебеҙ менән дә гүзәллек, күркәмлек, ыҫпайлыҡ үрнәге булырға тейешбеҙ, тигән фекерҙәмен.
Һәр заманда ла ҡатын-ҡыҙ тышҡы ҡиәфәтенә шул тиклем ҙур өҫтөнлөк биргән. Халыҡ ижады әҫәрҙәрендә лә ҡыҙҙың матурлығын баһалау уның йөҙөнән, тышҡы ҡиәфәтенән башлана. Милли кейемдәребеҙгә күҙ һалһаҡ та, беҙҙең башҡорт ҡатын-ҡыҙҙарының элек-электән матур­лыҡ­ҡа ҙур иғтибар биреүен аңлап була. Ҡайһы берҙәребеҙ, донъя көтөү мәшә­ҡәттәренә батып, үҙе­нә иғтибарҙы кәметә, ҡул һелтәй, ти­һәң дә була. Матур булыу өсөн аҡса кәрәк, былай ҙа ауырлыҡ менән еткерәбеҙ, тип яуаплар кемдер. Ә бит матур булыу – ҡиммәтле кейемдәр кейеүҙе, косме­тологтарға йөрөүҙе генә аңлатмай. Зауыҡлы, килешле итеп кейенеп, сәс­тәрен ыҫпай итеп йөрөткән ҡатындар һоҡ­ланмаҫлыҡ түгел. Ябай ғына нимәләр ҙә тор­мошобоҙға гүзәллек өҫтәп, кәйе­фебеҙҙе күтәреп ебәрергә һәләтле бит.
Матур булыу, уны һаҡлау - ул көн­дәлек хеҙмәт. Күптәрҙә, олоғайғас, миңә ярамағанмы, тигән ҡараш йәшәй. Минеңсә, киреһенсә, олоғай­ғас үҙеңде тағы ла нығыраҡ ҡарарға кәрәк. Ун һигеҙ, егерме йәштә матур­лыҡты күрһәтеү өсөн артыҡ нәмә кә­рәкмәй, сөнки йәшлек үҙе матурлыҡ, нимә кейһәң дә килешеп бара. Аҙаҡтан шул матурлыҡты һаҡлау өсөн тырышырға кәрәк. Тышҡы матур­лыҡ­та тырыш­лығың, үҙеңдең үҙеңә ҡарата булған ихтирамың һәм йәшәү рәүеше күренеп тора инде ул. Ҡатын-ҡыҙ тәбиғәттән бирелгән булмышына ҡара­ғанда мату­рыраҡ булып күренергә ты­рышмаһа, ул ҡатын-ҡыҙ түгел, тигән кемдер. Хоҙай гүзәл зат итеп яралтҡан икән, шул булмышҡа һәр йәштә лә тоғро ҡалырға тейешбеҙ. Матурлыҡтың юҡтыр сиктәре!
Эльнара ШАЙМАРҘАНОВА яҙып алды.
Роза ТАЖЕТДИНОВА фотоһы.
Читайте нас: