Күпме йылдар уҙһа ла...

... Ата-әсәһе күп өмөттәр бағлаған һөйөклө ҡыҙҙары Илүзәне ҡалаға педагогия институтына уҡырға ебәрә. Улар үҙҙәре лә ғүмерҙәрен уҡытыусы һөнәренә бағыш -
лағас (атаһы мәктәп директоры ла була), ғәзиздәрен дә уҡытыусы итергә теләй.

Йәш саҡ – дәртле саҡ. Илүзә лә һәүетемсә генә 2-се курста уҡып йөрөгәндә ғашиҡ булып, баш көллө мөхәббәт иленә сума. Тик һөйгәне ҡатынынан айырылған ир булып сыға. Матур тормошта үҫкән, тәрбиәле, тик яҡшыны ғына белгән ҡыҙ матур һөйләргә, алдашырға яратҡан, эш һөймәгән был кешегә ғашиҡ булып, бар донъяһын онота. Был егет тураһында белешеп, уға ҡағылышлы мәғлүмәттәргә эйә булған ата-әсә, әлбиттә, ҡыҙҙарының уның менән дуҫлашыуына ҡырҡа ҡаршы була. Тик Илүзә был хаҡта тыңларға ла теләмәй.

Улай ғына түгел, бер аҙҙан хатта һөйгәне менән бергә йәшәй башларға ҡарар итәләр. Тиҙҙән ҡыҙ ауырға ҡала, мөхәббәт емешенең тыуыуын түҙемһеҙлек менән көтә. Бер кемгә лә әйтмәһә лә, ваҡыт уҙыу менән ҡорһағы күренгәс, яҡындары был хаҡта белә. Бының менән килешергә теләмәйенсә, ата-әсә ҡыҙҙарын күндереп, дауаханаға алып бара һәм ауырын төшөрттөрә... Ҡыҙҙары теге ир менән араларҙы өҙөр ҙә артабан һәүетемсә уҡыуын дауам итер, тип өмөтләнә улар.

Илүзә дауахананан һыҙланып, ябығып килеп сыға. Тән ауыртыуынан бигерәк, йән яралары күңелен өтә... Ата-әсәнең өмөттәре аҡланмай – Ғәзим сәскәләр тотоп, ҡыҙҙың хәлен белергә килә һәм дуҫлыҡ артабан дауам итә. Ғашиҡтар артабан бергә фатирҙа йәшәй башлай. Ни эшләһен инде, ата-әсә күнә. Бик оҙаҡ көттөрмәй, Илүзә тағы ауырға ҡалып, малай таба. Студент ҡыҙға академ ял алып, уҡыуҙы туҡтатып торорға тура килә. Бала матур булып күҙгә күренеп үҫә. Уңған, бөхтә, матурлыҡты яратыусы ҡатын ябай ғына бер бүлмәле фатирҙы әкиәт иленә әйләндерә. Бешергән ризыҡтары ла телеңде йоторлоҡ була уның. Матурлыҡты тойоуы арҡаһында кейемде лә килешле, зауыҡлы итеп кейергә ярата. Дуҫ ҡыҙҙары уны бик ихтирам итә, һөйкөмлөлөгө, ҡатын-ҡыҙға хас баҫалҡылығы, нәзәкәт лелеге менән һәр кемде үҙенә тарта...
Институтты уҡып бөткәс, юлдарыбыҙ айырылды. Кисәге студенттар республиканың төрлө ерҙәренә таралышты. Улсаҡтарҙа кәрәҙле телефон булмағанлыҡтан, аралашыуҙар өҙөлдө. Һәр кем яңы ерҙә яңы тормош, эш башлап, тормош ығы-зығыһында юғала. Һуңғы йылдарҙа “Класташтар”, “Бәйләнештә” сайттары байтаҡ класташтарҙы һәм курсташтарҙы бер-береһен табырға ярҙам итте. Шулай беҙ ҙә курсташым менән табыштыҡ. Үткәндәрҙе хәтергә алдыҡ, әлегеләр тураһында һөйләштек. Һөйләшеп һүҙҙәр бөтмәне...

Илүзә һуңлабыраҡ булһа ла уҡыуын тамамлап, ҡулына диплом алған, уҡытыусы булып та эшләгән. Ә ғаилә тормошо атаһы күҙаллауы буйынса уңмай. Эш яратмаған, алдаҡсы, тупаҫ әҙәм менән донъялары алға тәгәрәмәй. Шулай Илүзәнең яйлап күҙҙәре асылғас, айырылышырға ҡарар итә. Уҡытыусының эш хаҡы менән әллә ҡайҙа китеп булмай тип, төплө уйлағандан һуң эшен ҡырҡа үҙгәртергә була. Ситтән тороп тағы ла бер юғары уҡыу йортон тамамларға баҙнат итә. Был юлы дизайнерға уҡый. Артабан дизайн буйынса белгес булараҡ үҙ эшен асып ебәрә. Аш-һыу бүлмәһе гарнитурҙары эшләү менән шөғөлләнә башлай ул. Еңел машинаһында барып, буласаҡ йыһаз урынын үлсәй, һүрәткә төшөрә. Ошо заказды эшселәре эшләй. Ҡала кешеләренең зауығына тура килтереп, матур йыһаздар тыуҙыра. Ҙур, яуаплы эш башҡарыуы нигеҙендә уның матурлыҡты күрә һәм тыуҙыра алыуы, шулай уҡ тырышлығы ята.

Яҙмыш юлында осраҡлы ғына үҙ парын да осрата. Тормош юлдашы ышаныслы, уңған, тырыш егет булып сыға. Уға кейәүгә сығып, ҡыҙҙары донъяға килә. Бәхетле тормош дауам итә. Был уның өсөн әкиәт кеүекбула, ысынлығына хатта ышанғыһы ла килмәй. Ә ире һәм улы – уның төп ярҙамсылары.