Сәләмәтлекте нығыталар

Помидор. Ул антиоксидант булған каротинға бай. Был матдә орга­низм­дың иммун системаһын нығытыуға булыш­лыҡ итә. Ғилми тикшеренеүҙәр күрһә­теүенсә, иммунитетты нығытыу йәһә­тенән каротин, Е витамины менән са­ғыштырғанда, күпкә һөҙөмтәлерәк икән.

Банан. Ундағы В6 витамины иммун системаһына ыңғай йоғонто яһай. Бынан тыш, ул бөйөрҙәге таштарҙы һәм йоҡо­һоҙлоҡто булдырмау өсөн файҙалы. Әйткәндәй, ике банан – көндәлек норма булған ике миллиграмм В6 витамины сығанағы.

Дегәнәк. Коллаген синтезын көсәй­тә һәм организмдағы күҙәнәк­тәрҙең йәшәү һәләтен күтәрә. Бынан тыш, ул күҙәнәктәрҙең үҫешенә булышлыҡ итә, ҡандағы лейкоциттар һәм тромбоциттар күләмен арттыра. Был иһә иммунитетты нығытыу һәм онкология сирҙәрен иҫкәртеү өсөн кәрәк.

Прополис. Тирене дымлан­ды­рыу­ға булышлыҡ итә, мускулдар массаһын үҫтерә, шешенеүгә ҡаршы тора, һыҙ­ланыуҙы кәметә. Өҫтәүенә прополис – көслө иммуностимулятор. Төрлө вирус­тарҙы һәм бактерияларҙы юҡ итергә ярҙам итә, ә был иммун системаһы өсөн мотлаҡ.

Бәшмәк. Лейкоциттарҙың бар­лыҡҡа килеү һәм йәшәү мөмкинлеген арттыра, организмдың төрлө сирҙәргә ҡаршы тороуына булышлыҡ итә.

Папайя. Ул хатта кипкән килеш тә файҙалы. Иммунитетты нығытып ҡына ҡалмай, төрлө бактерияларға, вирустарға ҡаршы торорға, ҡан әйләнешен көйләргә, организмды йәшәртергә ярҙам итә.

Үрҙә әйтелгәндәрҙең барыһы ла кәңәш кенә. Һәр кемдең организмы үҙенсәлекле, шуға күрә күңелегеҙгә ятҡан ризыҡтарға өҫтөнлөк бирегеҙ, шул уҡ ваҡытта сәләмәт туҡланыу тураһында ла онотмағыҙ.