Уларҙы көтөп алалар

Уларҙы көтөп алалар

Ҡырмыҫҡалы районының автоклубын белмәгән, күрмәгән кеше юҡтыр, моғайын.

Районыбыҙ был күп функ­циялы мәҙәни үҙәккә Рәсәй Президенты В.В. Путиндың указына ярашлы барлыҡҡа килгән “Мәҙәниәт” милли проекты ярҙамында эйә булды.

Ярты сәғәт эсендә генә юғары технологиялы сәхнәгә әүерелә алған был махсус ма­шинала мәҙәни сара үткәрер өсөн кәрәк булған бөтә нәмә бар. Шуға күрә уның менән клубтары булмаған ауылдарҙа ла рәхәтләнеп йәмле тамаша ҡоророға була.

Ошо көндәрҙә бик ҡыуаныслы хәбәр алдыҡ – Ҡырмыҫҡалы районы автоклубы республика конкурсында еңеү яулаған һәм 50 мең һумлыҡ сертификат менән бүләклән­гән.

- Автоклубта концерт менән килгәнебеҙҙе һәр ауыл халҡы көтөп ала. Тағы ҡасан киләһегеҙ, тип һорашып ҡына торалар. Клубтары булмаған һәм район үҙәгенән йыраҡ урынлашҡан ауыл халҡын ошондай тамашалар менән ҡыуандыра алғаныбыҙ өсөн үҙебеҙ ҙә шатланабыҙ һәм һәр ваҡыт бындай сараларға ҙур теләк менән йөрөйбөҙ. Өс турҙан торған конкурста еңеп сығыуыбыҙ өсөн һөйөнә­беҙ, әлбиттә. Жюри ағзалары еңеүселәрҙе билдәләгән саҡта, ауылдарға концерт менән сыҡҡан һәм интернет сел­тәрендәге тура трансляция­ларҙың иҫәбе буйынса баһала­ны. Финал этабына автоклуб эшмәкәрлеге тураһындағы видеоролик әҙерләнек һәм өс турҙы ла уңышлы үтеп, еңеү яуланыҡ, - ти автоклуб етәк­сеһе Гөлшат Ильясова.

Лия ТИМЕРОВА.