Гастроном "КООП Около" магазинына әйләнде

Х5 Group төркөм федераль селтәре ("Пятерочка", "Перекресток", "Чижик" магазиндары һәм башҡалар) һәм “Рәсәй үҙәк берлеге” стратегик килешеүе сиктәрендә был проект ғәмәлгә ашырылған.
- Республикала яҡын арала бындай форматта 100-гә яҡын маагзин асыласаҡ. Уларҙың 15-е инде асылыуға әҙерләнә. Беренсеһе Ҡырмыҫҡалы ауылында асылды, - тине Рәсәй үҙәк берлегенең проекттар үҙәге башҡарма директоры Михаил Захаров.
Район үҙәгендә йәшәүселәрҙе һәм ҡунаҡтарҙы маагзин асылышында район хакимиәте башлығы Әлфир Сабиров, шулай уҡ федераль селтәр, "Башпотребсоюз" һәм "Рәсәй үҙәк берлеге" етәкселәре сәләмләне.
- Магазинда һигеҙ меңдән артыҡ төрлө продукция һатыуға ҡуйылған. Ассортиментты тағын 2 меңгә арттырырға планлаштырабыҙ. Үҙ продукциябыҙҙы етештереү тураһында килештек. Һәм ул Х5 төркөмө селтәренә ебәреләсәк. Хәҙерге ваҡытта был төркөмдөң 16 магазинына Ҡырмыҫҡалы районы ҡулланыусылар йәмғиәтенең тауарҙары етештерелә, - тип һөйләне Башҡортостан ҡулланыусылар йәмғиәттәре берләшмәһе идараһы рәйесе Венер Ильясов.
Ҡулланыусылар кооперацияһы республикала сауҙаның яңы форматтарын әүҙем индерә. Эре саүҙа селтәре менән хеҙмәттәшлек, тауарҙарҙың заманса ассортиментын индереү мөмкинлеге бирәсәк. Яңыртылған магазин федераль селтәр магазинының мини-форматы булараҡ йәлеп итә, ә икенсе яҡтан, бында һатып алыусылар өсөн ғәҙәти булған кооператив продукцияһы ассортименты һәм урындағы етештереүселәр тауарҙары һатыла. Шулай уҡ был магазинда беҙҙең "Кармаскалинская новь", "Үзән", "Даирә" район гәзиттәренең яңы һандары һатылыуын билдәләп үтәбеҙ.
Магазинда сауҙа киңлеге планировкаһы үҙгәрҙе, касса аппараттары, һыуытҡыстар, сауҙа стеллаждары барлыҡҡа килде. Шулай уҡ залда кофе-машина урынлаштырылған. Заманса биҙәлгән магазинда һатып алыусылар тауарҙарҙы һәм эске интерьерҙы ҡыҙыҡһынып ҡаранылар.
- Яңыртылған магазин бик оҡшаны. Хаҡтары арзан. Ҡырмыҫҡалыла булғанда, һис шикһеҙ, бында инәм. Бында Ҡырмыҫҡалы икмәген һәр ваҡыт һатып алам. Яҡшы сифатлы урындағы продукцияһын һатып алырға тырышабыҙ, - тип фекерҙәре менән уртаҡлашты Валерий Кудряшов.
Яңыртылған магазин алға табан район үҙәгендә йәшәүселәрҙе һәм ҡунаҡтарҙы үҙ продукцияһы һәм заманса, сифатлы хеҙмәт күрһәтеүе менән һөйөндөрөр, тип ышанабыҙ.
Гөлсәсәк Әсәҙуллина.